شەرزات ءىسى: ۋاقىتشا ۇستاۋ يزولياتورىنىڭ باسشىسى قىزمەتىنەن بوساتىلدى

ىشكى ىستەر مينيسترلىگىنىڭ مالىمەتىنشە، الماتى وبلىسى ەڭبەكشىقازاق اۋدانىنى ۋاقىتشا ۇستاۋ يزولياتورىنداعى جاعداي بويىنشا تەكسەرۋ جۇرگىزىلدى.

- ۆيدەونى ۋاقىتشا ۇستاۋ يزولياتورىنىڭ بۇرىنعى قىزمەتكەرى تۇسىرگەنى انىقتالدى. ول بۇل ءۇشىن جەكە ۇيالى تەلەفونىن پايدالانعان. قىزمەتتىك ءتارتىپتى ورەسكەل بۇزعانى ءۇشىن ول ارنايى شەنىنەن ايىرىلىپ، جۇمىستان قۋىلدى، - دەلىنگەن حابارلامادا.

سونىمەن قاتار اتالعان فاكتى بويىنشا قىلمىستىق ءىس قوزعالدى.

- قىزمەتتىك ءتارتىپتى ورەسكەل بۇزعانى جانە تيىسىنشە باقىلاۋ جۇرگىزبەگەنى ءۇشىن 16 باسشى مەن قىزمەتكەر لاۋازىمنان بوساتىلۋعا دەيىن قاتاڭ تارتىپتىك جازاعا تارتىلدى. ونىڭ ىشىندە ۋ ۇ ي باسشىسى دا لاۋازىمنان بوساتىلدى، - دەپ اتاپ ءوتتى مينيسترلىكتەن.

بولعان جاعدايعا بايلانىستى ۋ ۇ ي- دە رەجيمدى باقىلاۋ كۇشەيتىلدى: قوسىمشا بەينەمونيتورينگ شارالارى ەنگىزىلىپ، ۇقساس مەكەمەلەردە جوسپاردان تىس تەكسەرۋلەر باستالدى.

وسىعان دەيىن الەۋمەتتىك جەلىدە 16 جاستاعى جاس ءوسپىرىم شەرزات پولاتتىڭ ولىمىنە قاتىستى ءىس بويىنشا ۇستالعاندار ۋاقىتشا ۇستاۋ يزولياتورىندا تۋعان كۇن تويلاپ جاتقانى تۋرالى ۆيدەو پايدا بولعان ەدى.

ەسكە سالايىق، بىلتىر 4 قازان كۇنى توبەلەستەن 16 جاسار جاس ءوسپىرىم قايتىس بولعانىن جازعانبىز.

كەيىن اشۋلى تالعارلىقتار جاسءوسپىرىم ولىمىنە بايلانىستى نارازىلىققا شىقتى.

2024 -جىلدىڭ 12- قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

15-قازان كۇنى تالعار قالاسىنىڭ اكىمى باحىت قۋاتبەك ۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلدى. ارتىنشا، تالعار اۋدانى اكىمى اپپاراتىنىڭ باسشىسى اسلان قاسىمبايەۆ قىزمەتىنەن قۋىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى