شەرزات بولاتتىڭ اكەسى پوليتسەيلەرگە پىشاقپەن شابۋىل جاسادى
استانا. KAZINFORM - بۇگىن، 10-جەلتوقساندا ساعات 15:30 دا الماتى وبلىسى ازات اۋىلىندا جەرلەۋ راسىمىندە قوعامدىق ءتارتىپ پەن اينالاسىنداعىلاردىڭ، ونىڭ ىشىندە كامەلەتكە تولماعان بالالاردىڭ قاۋىپسىزدىگىنە قاۋىپ توندىرگەن وقيعا بولدى.
الماتى وبلىسى پوليتسيا دەپارتامەنتىنىڭ مالىمەتىنشە، قارجاۋباي نۇرىموۆ پروكۋروردىڭ زاڭدىلىقتى ساقتاۋ تۋرالى تۇسىندىرمەلەرىن ەلەمەستەن، ءوزىن وتە اگرەسسيۆتى ۇستاعان، اينالاسىنداعىلارعا قاۋىپ ءتوندىرىپ، سۋيتسيد جاسايمىن دەپ قورقىتقان.
«سونداي-اق، پوليتسيا قىزمەتكەرىنە پىشاقپەن شابۋىل جاسادى. ونىڭ مىنەز-قۇلقى وزىنە دە، اينالاسىنداعىلارعا دا قاۋىپ ءتوندىردى. نۇرىموۆ جاعدايىنا الاڭداعان تۋىستارى مەن ادۆوكاتتارىنىڭ ءوتىنىشى بويىنشا ونىڭ ءومىرى مەن اينالاسىنداعىلاردىڭ ومىرىنە زيان كەلتىرمەۋ ماقساتىندا پوليتسيا قىزمەتكەرلەرى ونى ۇستاۋ ءۇشىن شارالار قابىلدادى»، - دەلىنگەن پوليتسيا تاراتقان حابارلامادا.
قازىرگى ۋاقىتتا ول پوليتسيا بولىمىنە جەتكىزىلگەن، ونىمەن پسيحولوگتار جۇمىس ىستەپ جاتىر.
پوليتسيا جاعدايدى تۇراقتاندىرۋ بويىنشا جۇمىستى جالعاستىرىپ جاتىر جانە ازاماتتاردى سابىرلى بولۋعا ۇندەدى.
«ازاماتتاردان تەك رەسمي دەرەككوزدەرگە سەنۋدى سۇرايمىز جانە جالعان مالىمەتتەردى تاراتۋ قىلمىستىق جاۋاپكەرشىلىككە دەيىن اكەلۋى مۇمكىن ەكەنىن ەسكە سالامىز»، - دەلىنگەن حابارلامادا.
ەسكە سالايىق، بۇگىن، 9-جەلتوقسان كۇنى تاڭەرتەڭ شەرزات بولاتتىڭ اعاسى ءولى تابىلعان ەدى. اقپاراتتى الماتى وبلىستىق پوليتسيا دەپارتامەنتى راستادى. پوليتسيا مالىمەتىنشە، مارقۇم وزىنە-ءوزى قول جۇمساعان.
مارقۇم قايتىس بولار الدىندا حات جازىپ كەتكەن. حات ءماتىنىن پوليتسيا جاريالادى.
