شري-لانكادا مايمىل ەلەكتر ستانسياسىنا كىرىپ كەتىپ، ەلدى جارىقسىز قالدىردى
استانا. قازاقپارات - 9-اقپان كۇنى شري-لانكا استاناسى كولومبونىڭ وڭتۇستىك شەتىندەگى ەلەكتر ستانسياسىنا مايمىل كىرىپ كەتىپ، بۇكىل ەل بويىنشا ەلەكتر ەنەرگياسىنىڭ ۇزىلۋىنە سەبەپ بولدى.
BBC-دىڭ حابارلاۋىنشا، وقيعا جەرگىلىكتى ۋاقىت بويىنشا 11:00-دا بولعان. شري-لانكانىڭ ەنەرگەتيكا ءمينيسترى كۋمارا دجاياكودي مايمىلدىڭ ەلەكتر جەلىسىندەگى ترانسفورماتورعا ءتيىپ كەتكەنىن، سونىڭ سالدارىنان ەلەكتر جۇيەسىنىڭ ىستەن شىققانىن مالىمدەدى.
ءمينيستردىڭ ايتۋىنشا، ينجەنەرلەر قازىرگى ۋاقىتتا اقاۋدى جويۋ جۇمىستارىن جۇرگىزىپ جاتىر جانە ەلەكترمەن جابدىقتاۋدى مۇمكىندىگىنشە تەز قالپىنا كەلتىرۋ ءۇشىن ءتيىستى شارالار قابىلدانىپ جاتقان كورىنەدى.
الايدا، وقيعادان كەيىن ءۇش ساعات ۋاقىت وتكەنىنە قاراماستان، كەيبىر ايماقتاردا ەلەكتر قۋاتى تولىق قالپىنا كەلتىرىلگەن جوق.
سوڭعى جىلدارى شري-لانكادا ەلەكتر ستانتسيالارىنداعى تەحنيكالىق اقاۋلارعا بايلانىستى بىرنەشە رەت ەل اۋقىمىنداعى جارىق ءوشىپ قالىپ وتىرعان.
ەسكە سالساق شري-لانكا بريكس-كە كىرۋگە ءوتىنىش بەرگەن ەدى.
اۆتور
دانا نۇرباقىت
