Equilibrium Capital قازاقستاندا ءۇش ينۆەستيتسيالىق قور قۇرادى
مەملەكەت باسشىسى قاسىم-جومارت توقايەۆ ماجارستان پرەمەر-ءمينيسترى ۆيكتور وربانمەن اقورداداعى كەزدەسۋدەن كەيىنگى بىرلەسكەن مالىمدەمەدە استانا حالىقارالىق قارجى ورتالىعىنا باۋىرلاس ەلدىڭ العاشقى كومپانياسى تىركەلگەنىن ءمالىم ەتتى، دەپ حابارلايدى Kazinform اگەنتتىگى.
«كەلەسى اپتادا استانادا ەكى ەل كاسىپكەرلەرىنىڭ قاتىسۋىمەن بيزنەس-فورۋم وتەدى.
تاعى ءبىر ماڭىزدى باعىت - كولىك-لوگيستيكا سالاسىنداعى ىنتىماقتاستىقتى نىعايتۋ. ءبىز ترانسكاسپي ءدالىزى اياسىندا بىرلەسكەن جوبالاردى ىسكە اسىرۋ جولدارىن جان-جاقتى تالقىلادىق. بۇل سالاداعى ىقپالداستىق ءوزارا ساۋدا-ساتتىقتىڭ جاندانۋىنا تىڭ سەرپىن بەرەدى دەپ ۇمىتتەنەمىز. سونداي-اق، اتوم ەنەرگەتيكاسى، سۋ رەسۋرستارىن باسقارۋ، سيرەك كەزدەسەتىن مەتال ءوندىرۋ سالاسىندا مول مۇمكىندىك بار ەكەنىن اتاپ وتتىك. قارجى سالاسىنداعى بايلانىستار دا قارقىندى دامىپ كەلە جاتىر. جاقىندا Equilibrium Capital كومپانياسى استانا حالىقارالىق قارجى ورتالىعىندا شەتەلدىك قورلاردى باسقارۋ مارتەبەسىنە يە بولدى»، - دەدى پرەزيدەنت.
مەملەكەت باسشىسىنىڭ سوزىنشە، بۇل وسىنداي مارتەبەگە قول جەتكىزگەن ماجارستاننىڭ العاشقى كومپانياسى.
«كاسىپورىن جاسىل ەنەرگەتيكا جانە دەنساۋلىق ساقتاۋ سالاسىنداعى جوبالاردى قارجىلاندىرا الادى. كومپانيانىڭ قازاقستاندا ءۇش ينۆەستيتسيالىق قور قۇرۋعا نيەتى بار»، - دەدى قاسىم-جومارت توقايەۆ.
بۇعان دەيىن اقوردادا ماجارستان پرەمەر-ءمينيسترىن قارسى الۋ سالتاناتى وتكەنىن جازعان ەدىك.
كەشە كەشكە ۆيكتور ورباندى استانا اۋەجايىندا پرەمەر-ءمينيستردىڭ ورىنباسارى سەرىك جۇمانعارين قارسى العان بولاتىن. قازاقستان باسشىلىعىمەن كەلىسسوز بارىسىندا قازاقستان مەن ماجارستان اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى تەرەڭدەتۋ ماسەلەلەرى تالقىلانادى دەپ جوسپارلانىپ وتىر.
ايتا كەتۋ كەرەك، ەرتە استانادا تۇركى مەملەكەتتەرى ۇيىمىنىڭ 10- ءسامميتى وتەدى. وعان ازەربايجان، قىرعىزستان، تۇركيا، وزبەكستان پرەزيدەنتتەرى، ۇيىمعا باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.
