Egov-تاعى ەلەكتروندى قۇجاتىڭىزدا قاتە كەتسە، ءوزىڭىز تۇزەتە الاسىز
مالىمەتتەردى تۇزەتۋدىڭ سەگىز سەرۆيسى eGov.kz ەلەكتروندى ۇكىمەت پورتالىندا جانە eGov Mobile موبيلدى قوسىمشاسىندا قولجەتىمدى. سەرۆيستەر مەملەكەتتىك ورگانداردىڭ اقپاراتتىق جۇيەسىندەگى قاتە دەرەكتەردى وزەكتەندىرۋگە جانە بولاشاقتا مەملەكەتتىك قىزمەتتەردى كەدەرگىسىز الۋعا مۇمكىندىك بەرەدى، دەپ حابارلايدى Kazinform.
وتباسى (نەكە، تۋۋ، نەكەنى بۇزۋ، بالا اسىراپ الۋ، اكە بولۋدى انىقتاۋ، اتى-ءجونىن وزگەرتۋ، قايتىس بولۋ) ۆاكسيناتسيا پاسپورتىنداعى ايماق، كولىك قۇرالدارىنىڭ قاتە مالىمەتتەرى تۋرالى، مىندەتتى مەملەكەتتىك تىركەۋگە جاتپايتىن جىلجىمالى مۇلىكتىڭ كەپىلى جانە اسكەري قىزمەت تۋرالى مالىمەتتەردى وزەكتەندىرىپ جانە دۇرىس ەمەس دەرەكتەر انىقتالعان جاعدايدا ءوز مالىمەتىن تۇزەتۋگە بولادى.
زاڭدى تۇلعانىڭ جانە جىلجىمايتىن مۇلىك وبەكتىلەرىنىڭ اتاۋى مەن ورنالاسقان جەرى تۋرالى مالىمەتتەر دە وزەكتەندىرۋگە جاتادى.
سونداي-اق، ءبىلىم تۋرالى مالىمەتتەردى تۇزەتۋگە، اتاپ ايتقاندا، ج و و ديپلومدارى مەن ت ج ك ب، اتتەستات دەرەكتەرىن وزەكتەندىرۋگە مۇمكىندىك بار.
«وزدەرىڭىز بىلەتىندەي، ازاماتتىڭ پاتەرى نەمەسە اۆتوكولىگى تۋرالى دەرەكتەر مەملەكەتتىك ورگانداردىڭ ءتۇرلى دەرەكتەر بازاسىندا ورنالاسقان. ونىڭ ىشىندە بۇل مالىمەتتەر پايدالانۋشىنىڭ eGov.kz جانە eGov Mobile جەكە كابينەتىندە كورسەتىلەدى. كەي جاعدايدا مالىمەتتەر دۇرىس بولماۋى مۇمكىن. ال ول مەملەكەتتىك قىزمەتتەردى الۋ مۇمكىندىگىنە اسەر ەتەدى. ەندى ازاماتتاردىڭ ءومىرىن جەڭىلدەتۋ ءۇشىن ءبىز مەملەكەتتىك ورگاندارمەن بىرلەسىپ مالىمەتتەردى تۇزەتۋدىڭ 8 سەرۆيسىن جاسادىق. مىسالى، ەگەر سىزدە وتباسى نەمەسە ءبىلىم تۋرالى قۇجاتتاردا دۇرىس ەمەس اقپارات بولسا، قۇجاتتىڭ ءتۇپنۇسقاسىنىڭ فوتوسۋرەتىن نەمەسە ت. ب. قاجەتتى مالىمەتتەردى قوسىپ ءوتىنىش بەرە الاسىز. ءوتىنىم وڭدەلەدى جانە مالىمەتتەردى ءتيىستى مەملەكەتتىك ورگان تۇزەتەدى»، - دەيدى «ۇلتتىق اقپاراتتىق تەحنولوگيالار» اق باسقارما ءتوراعاسى روستيسلاۆ كونياشكين.
eGov.kz پورتالىنداعى قاتەنى مىنا سىلتەمەلەر ارقىلى تۇزەتە الاسىز:
ۆاكسيناتسيا بويىنشا مالىمەتتەردى تۇزەتۋ
كولىك قۇرالدارىنىڭ قاتە مالىمەتتەرىن تۇزەتۋ
زاڭدى تۇلعانىڭ اتاۋلارىن، ورنالاسقان جەرىن تۇزەتۋ
ازاماتتىق حال اكتىسىن تىركەۋ تۋرالى مالىمەتتەردى وزەكتەندىرۋ (تۇزەتۋ)
اسكەري قىزمەت تۋرالى مالىمەتتەردى وزەكتەندىرۋ (تۇزەتۋ)
ءبىلىم تۋرالى قۇجاتتار تۋرالى مالىمەتتەردى وزەكتەندىرۋ (تۇزەتۋ)
مالىمەتتەردى تۇزەتۋ ءۇشىن مىندەتتى ورىستەردى تولتىرىپ، ماسەلەنى سيپاتتاپ، قاجەت بولعان جاعدايدا قۇجاتتىڭ كوشىرمەسىن تىركەپ قىزمەتكە قول قويۋ قاجەت.
سونداي-اق، «تۇزەتۋ قىزمەتتەرى» eGov Mobile موبيلدى قوسىمشاسىنداعى باستى بەتتە دە تۇر.
قىزمەت كورسەتۋ ناتيجەسى مالىمەتتەردى وزەكتەندىرۋ تۋرالى حابارلاما نەمەسە قىزمەت كورسەتۋدەن باس تارتۋ تۋرالى دالەلدى جاۋاپ نىسانىندا جەكە كابينەتكە جىبەرىلەدى.
اۆتور
جانات قاپالبايەۆا
