شەشىمدى قورىقپاي قابىلداۋ قاجەت - انتيكور باسشىسى شەنەۋنىكتەر جايلى

بۇل جايىندا سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي Jibek Joly تەلەارناسىنىڭ «ۋادە» باعدارلاماسىنا بەرگەن ەكسكليۋزيۆتى سۇحباتىندا ايتتى.

ونىڭ ايتۋىنشا، ۇزاققا سوزىلاتىن كەلىسىم ءراسىمى مەن شەنەۋنىكتەردىڭ باتىلسىزدىعى ماسەلەنىڭ شەشىلمەي قالۋىنا الىپ كەلەدى. ال قابىلدانعان شارالار وزەكتىلىگىن جوعالتىپ الادى.

- مەملەكەت باسشىسى شەنەۋنىكتەردىڭ شەشىم قابىلداۋ كەرەكتىگىنە، قورىقپاۋى تيىستىگىنە نازار اۋدارتتى. ارينە، بۇل تۇرعىدان كەلگەندە شەشەۋنىك كەمەلىنە جەتكەن، ءوز ءىسىنىڭ شەبەرى بولۋى ءتيىس، - دەدى اسحات جۇماعالي.

اگەنتتىك ءتوراعاسىنىڭ اتاپ وتۋىنشە، مەملەكەتتىك قىزمەتشى ءوزىنىڭ ءىس-ارەكەتى زاڭ اياسىندا بولسا جانە باستامالارى ەكونوميكالىق تيىمدىلىككە باعىتتالسا، وندا قورىقپاي شەشىم قابىلداۋى قاجەت.

جەمقورلىق نەگە تىيىلماي تۇر

انتيكور باسشىسى پارا بەرۋ مەن الۋعا قاتىستى احۋالعا وراي دا پىكىرىن ءبىلدىردى. ونىڭ پايىمىنشا، پارا بەرۋدى داستۇرگە اينالعان دەۋگە بولمايدى. ءبىراق، بۇل ماسەلە ءالى دە بولسا وزەكتىلىگىن جويعان جوق. ماسەلەن، 2024-جىلى اگەنتتىك 87,7 ميلليارد تەڭگە بيۋجەت قاراجاتىنىڭ ۇرلاۋىنا جول بەرمەدى.

- پارا بەرۋگە ۋادە ەتۋ نەمەسە ۇسىنۋدى قىلمىسقا جاتقىزۋ ماسەلەسى قاراستىرىلۋدا. حالىقارالىق ساراپشىلارىمىزدىڭ ۇسىنىمىنا سايكەس جانە حالىقارالىق تاجىريبەگە وراي بۇل دا ايتارلىقتاي تەجەۋشى فاكتور بولادى، - دەدى اسحات جۇماعالي.

بۇعان دەيىن انتيكور باسشىسى ەلىمىزدەگى سيفرلىق «بويالعان» اقشا جوباسىنىڭ العاشقى ناتيجەسى جايلى ايتىپ بەرگەنىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى