ۇشاق بورتىندا مەديتسينالىق كومەك قالاي كورسەتىلەدى؟
ۇشاق - قاۋىپسىزدىك ستاندارتتارىن قاتاڭ ساقتاۋ جانە ەكيپاجداردى كاسىبي دايارلاۋ ارقىلى ەڭ قاۋىپسىز كولىك تۇرلەرىنىڭ ءبىرى بولىپ تابىلادى.
الايدا، رەيس كەزىندە جولاۋشىلاردىڭ قاۋىپسىزدىگى اۋە كەمەسىنىڭ دايىندىعىنا عانا ەمەس، سونىمەن قاتار ولاردىڭ دەنساۋلىعى مەن ۇشۋعا دەگەن فيزيكالىق دايىندىعىنا دا بايلانىستى، - دەپ حابارلايدى Tengritravel.kz ءتىلشىسى.
شەتەلدىك زەرتتەۋلەرگە سايكەس، الەمدەگى ءاربىر مىڭىنشى رەيستە شۇعىل مەديتسينالىق كومەك قاجەت بولادى ەكەن. سوندىقتان بورتسەرىكتەردى وقىتۋعا مىندەتتى تۇردە جەدەل دەن قويۋ قاجەت. سەبەبى جولاۋشىلارعا دارىگەرگە دەيىنگى مەديتسينالىق كومەك كورسەتۋ ماڭىزدى. ەلىمىزدەگى اۋە كومپانيالارىنىڭ بورتسەرىكتەرى جىل سايىنعى ترەنينگتەردە جۇرەك توقتاعان كەزدە جۇرەك-وكپە رەانيماتسياسىن جۇرگىزۋدى دە ۇيرەنگەن. بۇل دايىندىق دەڭگەيى ولاردى بورتتاعى قاۋىپسىزدىك پەن قامقورلىقتىڭ سەنىمدى ساقشىلارىنا اينالدىرادى. سونداي-اق جولاۋشىلارعا ۇشۋعا سەنىمدىلىك بەرەدى.
اۋە تاسىمالى تۋرالى ەرەجەگە سايكەس، قازاقستانداعى ءاربىر اۋە كەمەسى بورتتىق ءدارى قوبديشالارىمەن جانە وتتەگى باللوندارى مەن اۆتوماتتى دەفيبريللياتورلاردى قوسا العاندا قاجەتتى مەديتسينالىق جابدىقتاردىڭ ەڭ از جيىنتىعىمەن جابدىقتالعان. سونداي-اق بورتتا كاسىبي مەديتسينالىق كومەك قاجەت بولعان جاعدايدا بىلىكتى دارىگەرلەر عانا پايدالانا الاتىن مەديتسينالىق جيناق بولادى.
ۇشاق بورتىندا مەديتسينالىق كومەك كورسەتۋ ءبىزدىڭ ەلىمىزدە ءجيى كەزدەسەدى. ماسەلەن، الماتىدان ىستامبۇلعا ۇشاتىن رەيستە وتباسىمەن بىرگە ۇشقان جولاۋشى كۇتپەگەن جەردەن ەپيلەپسيالىق ۇستاماعا ۇشىرادى. بورتتاعى نيەۆروپاتولوگ پاتسيەنتتىڭ جاعدايىن تۇراقتاندىرۋعا كومەكتەستى. باسقا رەيس كەزىندە جولاۋشىلاردىڭ ءبىرى مۇرىننان ۇزدىكسىز قان كەتە باستادى. ەرىكتى دارىگەرلەر مەن ستيۋاردەسسالار قان كەتۋدى توقتاتا الدى.
وتە اۋىر جاعدايلاردا ەكيپاج بورتتىڭ قونۋىنا دەيىن نەمەسە قاجەت بولعان جاعدايدا جوسپارلانباعان قونۋعا دەيىن جەدەل جاردەم شاقىرا الادى. الماتى مەن استانا اراسىنداعى رەيستە جولاۋشىلاردىڭ ءبىرى ەسىنەن تانىپ قالدى. بورتسەرىكتەر مەن بورتتاعى نەفرولوگ العاشقى مەديتسينالىق كومەك كورسەتىپ، وتتەگىمەن قامتاماسىز ەتتى، ال قونعان كەزدە ونى جەدەل جاردەم كۇتىپ تۇردى. باسقا رەيستە جولاۋشى رەيسكە دەيىن ستاتسيونارلىق مەديتسينالىق باقىلاۋدا بولعان 5 ايلىق بالاسىنا كومەك سۇرادى. نارەستەنىڭ تىنىس الۋى قيىن بولدى، تەرىسى ءتۇسىن وزگەرتتى. بورتتاعى فەلدشەر جەدەل مەديتسينالىق كومەك قوبديشاسىنان پايدالانۋدى ۇسىندى. ءبىراق بۇل كومەكتەسپەدى. سوندىقتان ەكيپاج شۇعىل قونۋ تۋرالى شەشىم قابىلدادى. جەردەگى ۇشاقتى دارىگەرلەر كۇتىپ، بالا اۋرۋحاناعا جاتقىزىلدى.
