شاشتىڭ ەرتە اعارۋى قانداي اۋرۋلار جايلى بەلگى بەرۋى مۇمكىن؟ ەندوكرينولوگ جاۋابى

بۇل جايلى ەندوكرينولوگ يۋليا سيدوركينا Gazeta.ru-گە ايتىپ بەردى.

«اق شاش - جاس ەرەكشەلىگىنىڭ تابيعي وزگەرىسىنىڭ بەلگىسى، سەبەبى ۋاقىت وتە اعزادا مەلانين از بولىنە باستايدى. ادەتتە، العاشقى اق شاش 25-30 جاستا پايدا بولادى»، - دەيدى ەندوكرينولوگ.

ول سونداي-اق شاشتىڭ ەرتە اعارۋى اۋرۋ بەلگىسى بولۋى مۇمكىن ەكەنىن ايتتى. ولاردىڭ ىشىندە كەڭ تارالعاندارىنا - اعزاداعى گورموندار بۇزىلىسى، اسقورىتۋ جۇيەسى اۋرۋلارى، اۋتويممۋندى اۋرۋلار، دارۋمەندەر جەتىسپەۋشىلىگى (مىرىش، مىس، تەمىر، كالتسي، ا توبىنىڭ دارۋمەندەرى، D دارۋمەنى)، كەي ءدارى-دارمەكتەردىڭ قوسىمشا اسەرى، جۇكتىلىك، لاكتاتسيا، سوزىلمالى اۋرۋ سيندرومى جانە كۇيزەلىس جاتادى. كۇيزەلىس كورتيزول مەن ادرەنالين گورموندارىنىڭ شىعۋىن ىنتالاندىرادى، ال ولار ءوز كەزەگىندە قان تامىرلار تارىلۋىنا جانە شاش تۇيىنشەلەرىندەگى قاناينالىمنىڭ ناشارلاۋىنا اكەلەدى.

«شاشتىڭ ەرتە اعارۋىن قولايسىز ەكولوگيالىق جاعداي دا ىنتالاندىرادى. مىسالى، اعزاعا ۇزاق ۋاقىت بويى نەمەسە قارقىندى تۇردە ەلەكتروماگنيتتى تولقىنداردىڭ نەمەسە ۋلتراكۇلگىننىڭ اسەر ەتۋى. زياندى وندىرىستەردە نەمەسە قيىن كليماتتىق شارتتاردا جۇمىس ىستەۋ دە - قاۋىپ فاكتورى. تەمەكى تارتۋ، الكوگول ءىشۋ جانە ەسىرتكى پايدالانۋ دا اق شاشتىڭ ەرتە پايدا بولۋىنا اكەلەدى.

سونداي-اق مەلانين وندىرىسىنە اقۋىزدىڭ جەتىسپەۋى جاعىمسىز اسەر ەتۋى مۇمكىن. مىسالى، ادام جىلدام ارتىق سالماقتان ارىلعىسى كەلىپ، قاتاڭ ديەتالار ساقتاعاندا نەمەسە ۆەگان بولسا، اعزاعا اقۋىز جەتپەۋى مۇمكىن. ۇيقى رەجيمىنىڭ بۇزىلۋى دا اق شاشتىڭ ەرتە پايدا بولۋىنا اكەلەدى»، - دەدى دارىگەر.

الايدا ماماننىڭ ايتۋىنشا، اق شاشتىڭ ەرتە پايدا بولۋىنىڭ نەگىزگى فاكتورى - گەنەتيكا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى