شاعىن جانە ورتا بيزنەسكە اكىمشىلىك جۇكتەمەنى ازايتۋدى جالعاستىرۋ كەرەك - سەنات ءتوراعاسى
شاعىن جانە ورتا بيزنەس ەكونوميكانى دامىتۋدىڭ ماڭىزدى درايۆەرلەرىنىڭ ءبىرى بولۋى ءتيىس. بۇل تۋرالى سەناتتا ءتوراعاسى ماۋلەن اشىمبايەۆ ايتتى، دەپ حابارلايدى Kazinform.
«مەملەكەت باسشىسى بيىلعى جولداۋىندا ەكونوميكالىق دامۋدىڭ جاڭا ۇلگىسىنە كوشۋدىڭ نەگىزگى باسىمدىقتارىن بەلگىلەپ بەردى. 2029 -جىلعا قاراي ۇلتتىق ەكونوميكانىڭ كولەمىن 2 ەسەگە ۇلعايتىپ، 450 ميلليارد ا ق ش دوللارىنا جەتكىزۋ ەسكەرىلگەن. بۇل - اۋقىمدى ءارى كۇردەلى مىندەت. وسى رەتتە، شاعىن جانە ورتا بيزنەس ەكونوميكانى دامىتۋدىڭ ماڭىزدى درايۆەرلەرىنىڭ ءبىرى بولۋى ءتيىس. جالپى، شاعىن جانە ورتا كاسىپكەرلىكتى دامىتۋ جانە قولداۋ مەملەكەتتىڭ نەگىزگى باسىمدىقتارىنىڭ ءبىرى»، - دەدى م. اشىمبايەۆ سەناتتا «قازاقستان رەسپۋبليكاسىندا شاعىن جانە ورتا كاسىپكەرلىكتى دامىتۋ» تاقىرىبىندا ءوتىپ جاتقان ۇكىمەت ساعاتىندا.
بۇل تۇرعىدا سەنات ءتوراعاسى پارلامەنت ۇكىمەتپەن بىرلەسىپ، ءتيىستى نورماتيۆتىك- قۇقىقتىق بازانى جەتىلدىرۋ جولىندا ۇنەمى بەلسەندى جۇمىس ىستەپ جاتقانىن ايتتى.
«قازىر دەپۋتاتتاردىڭ قاراۋىنداعى قۇجاتتاردىڭ قاتارىندا بيزنەستى جۇرگىزۋ ماسەلەلەرى جونىندەگى زاڭ جوباسى دا بار. بۇگىنگى ءىس- شارامىز اتالعان زاڭ جوباسىنىڭ ساپاسىن ارتتىرۋعا دا وڭ اسەرىن تيگىزەدى دەپ سەنەمىز. ەلىمىزدە بيزنەستى دامىتۋ باعىتىندا ارنايى ۇلتتىق جوبا قابىلدانعانى بەلگىلى. سونداي- اق شاعىن جانە ورتا كاسىپكەرلىكتى دامىتۋدىڭ 2030 -جىلعا دەيىنگى تۇجىرىمداماسى ىسكە اسىرىلىپ جاتىر. كاسىپكەرلەرگە جان-جاقتى جانە كەشەندى قولداۋ كورسەتىلىپ وتىر. شاعىن جانە ورتا بيزنەستى تەكسەرۋگە ءۇش جىلدىق موراتوري جاريالانعانى دا بەلگىلى. ول وسى جىلدىڭ سوڭىنا دەيىن قولدانىستا بولادى. اكىمشىلىك جۇكتەمەنى ازايتۋ باعىتىندا دا ءبىراز ءىس-شارالار جۇزەگە اسىرىلدى. وسىنداي جۇمىستاردى الداعى ۋاقىتتا جاڭا قارقىنمەن جۇرگىزۋىمىز قاجەت. بۇگىنگى ۇكىمەت ساعاتى بۇل باعىتتاعى ماڭىزدى باستامالاردى جان-جاقتى تالقىلىپ، تۇجىرىمداۋعا مۇمكىندىك بەرەدى دەپ سەنەمىز»، - دەدى ماۋلەن اشىمبايەۆ.
