ش ى ۇ- عا مۇشە ەلدەردىڭ قۇزىرلى ورگاندارى 69 تەراكتىنىڭ جولىن كەستى
وزبەكستان استاناسى تاشكەنتتە شانحاي ىنتىماقتاستىق ۇيىمى ايماقتىق تەرروريزمگە قارسى قۇرىلىمىنىڭ (ش ى ۇ ا ت ق ق) توعىزىنشى حالىقارالىق عىلىمي-پراكتيكالىق كونفەرەنسياسى ءوتىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
شاراعا ش ى ۇ- عا مۇشە مەملەكەتتەردەن كەلگەن ۋاكىلەتتى ورگاندار مەن حالىقارالىق ۇيىمداردىڭ وكىلدەرى قاتىستى.
كونفەرەنسيادا بايانداما جاساعان ش ى ۇ ا ت ق ق اتقارۋ كوميتەتىنىڭ ديرەكتورى رۋسلان ميرزايەۆ تەرروريزمگە قارسى جۇرگىزىلگەن جۇمىستاردىڭ ناتيجەسىنە توقتالدى.
«ش ى ۇ ەلدەرىنىڭ قۇزىرەتتى ورگاندارى اراسىنداعى ۇيلەسىمدى جۇمىس پەن ءوزارا اقپارات الماسۋ ناتيجەسىندە ءبىزدىڭ ايماقتا تەرروريستىك ۇيىمداردىڭ جاسىرىنعان 73 توپتىڭ جانە 69 تەرراكتىنىڭ جولى كەسىلدى. 1440 تەرروريستىك، سەپاراتيستىك جانە ەكسترەميستىك سيپاتتاعى 91 قىلمىستىڭ الدىن الدىق. 507 حالىقارالىق تەرروريستىك ۇيىم كوشباسشىسى انىقتالدى، 447 ءسى ۇستالدى، 54 ءى سوتتالدى، 182 ءسىنىڭ كوزى جويىلدى. 123 شەتەلدىك سودىر انىقتالدى، 13166 قارجىلاندىرۋ ارناسى اشكەرە بولدى، تەرروريستىك جانە ەكسترەميستىك ماقساتتاردا پايدالانىلعان 5 زاڭسىز كوشى-قون ارناسى انىقتالدى. جاھاندىق جەلىدەگى بىرلەسكەن كۇش-جىگەرمەن تەرروريزم مەن ەكسترەميزمدى ناسيحاتتايتىن 25 مىڭعا جۋىق اقپاراتتىق رەسۋرستىق ماتەريالدار بۇعاتتالدى»، - دەپ توقتالدى رۋسلان ميرزايەۆ.
ش ى ۇ باس حاتشىسىنىڭ ورىنباسارى نۇرلان ەرمەكبايەۆ قازىر الەمدە بولىپ جاتقان اسكەري-ساياسي پروتسەستەردىڭ قاۋىپى جوعارى ەكەنىن اتاپ ءوتتى.
«كەيبىر زاماناۋي قارۋلى قاقتىعىستاردىڭ ناتيجەسى الەمنىڭ گەوساياسي قۇرىلىمىن وزگەرتەدى جانە ول ونداعان جىلدار بويى ساقتالادى. ماسەلەن، ب ۇ ۇ- نىڭ ازىق-تۇلىك جانە اۋىل شارۋاشىلىق ۇيىمىنىڭ مالىمەتىنە ساي، 2017-جىلدان باستاپ ازىق-تۇلىك قاۋىپسىزدىگى جاعدايى كۇرت ناشارلادى. ەگەر 2017-جىلى الەمنىڭ 46 ەلىندە 155 ميلليون ادام اشتىقتا ءومىر سۇرسە، 2022-جىلدىڭ قورىتىندىسى بويىنشا بۇل كورسەتكىش ءوستى. اتاپ ايتقاندا، 58 ەلدە 258 ميلليون ادام اشتىق دەڭگەيىندە ءومىر ءسۇرىپ جاتىر. ياعني، جىل سايىن ازىق-تۇلىكتىڭ جەتىسپەۋشىلىگى %20 ءوسىپ وتىر. بۇعان كليماتتىڭ وزگەرۋى، ەكونوميكالىق جاعداي مەن اسكەري قاقتىعىستار اسەر ەتەدى»، - دەدى نۇرلان ەرمەكبايەۆ.
سپيكەر تاۋار تاسىمالداۋ مارشرۋتتارىنىڭ جابىلۋى مەن وزگەرۋى ينفلياتسياعا، ەنەرگيا تاپشىلىعىنا ءتىپتى حالىقارالىق قاۋىپسىزدىك ماسەلەلەرىنە سەبەپ بولىپ وتىرعانىن اتاپ ءوتتى. وسىعان بايلانىستى شىۇ قاۋىپسىزدىكتەن بولەك ساۋدا- ەكونوميكالىق، ساياسي، يننوۆاتسيالىق، مادەني-گۋمانيتارلىق جانە باسقا دا سالالارداعى ىنتىماقتاستىققا كوڭىل اۋدارادى.
