ديماش قۇدايبەرگەن، مايا بەكبايەۆا… تاعى 5 ادام قازاقستاننىڭ «ىزگى نيەت» ەلشىسى اتاندى
استانا. KAZINFORM - سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين بىرنەشە تانىمال قازاقستاندىققا «ىزگى نيەت» ەلشىسى كۋالىگىن سالتاناتتى تۇردە تابىستادى.
ەسكە سالايىق، بۇعان دەيىن س ءى م قازاقستاننىڭ «ىزگى نيەت» ەلشىلەرىنىڭ العاشقى توبىنا دا وسىنداي كۋالىكتەر تابىستاعان.
بۇل جولعى تىزىمگە ايگىلى ءانشى ديماش قۇدايبەرگەننەن بولەك قازاقستان جانە يتاليا تەاترلارىنىڭ وپەرا ءانشىسى جانە ءسوليسى ماريا مۋدرياك، بەلگىلى ءتىلشى، تەلەجۇرگىزۋشى جانە پروديۋسەر مايا بەكبايەۆا، تاريح عىلىمدارىنىڭ كانديداتى جانە ارحەولوگ دميتري ۆوياكين، «Qazaq Geography» باسقارما ءتوراعاسى، ەتنوگراف عالىم ايگەرىم مۇساعاجينوۆا ەنىپتى.
- مەملەكەت باسشىسى قاسىم-جومارت توقايەۆتىڭ باستاماسىمەن قولعا الىنعان بۇل جوبا ەلىمىزدىڭ يميدجىن نىعايتۋ جانە ونىڭ جەتىستىكتەرى مەن قۇندىلىقتارىن شەتەلدە دارىپتەۋ جولىنداعى تاعى ءبىر ماڭىزدى قادام بولىپ تانىلدى. قازىرگى گەوساياسي جاعدايدا قازاقستان جۇرگىزىپ وتىرعان ب ۇ ۇ جارعىسىنا ساي حالىقارالىق قۇقىق نەگىزدەرى بويىنشا جۇرگىزىلەتىن تەڭگەرىمدى جانە پراگماتيكالىق سىرتقى ساياساتىنىڭ ماڭىزى ارتىپ كەلەدى. سىرتقى الاڭدا قازاقستان ءوزىن جاھاندىق جانە وڭىرلىك ىستەردەگى سەنىمدى سەرىكتەس جانە حالىقارالىق ۇيىمداردىڭ بەلسەندى قاتىسۋشىسى رەتىندە ۇستاپ كەلەدى. قازاقستاننىڭ بيىل ءبىر مەزگىلدە التى بىردەي حالىقارالىق ۇيىمعا ءتوراعالىق ەتۋى وسىنىڭ دالەلى بولا الادى، - دەدى سىرتقى ىستەر ءمينيسترىنىڭ ءبىرىنشى ورىنباسارى.
سونداي-اق، ول سىرتقى ىستەر مينيسترلىگى شەتەلدىك اۋديتورياعا قازاقستاننىڭ مادەني مۇراسىن، ۇلتتىق الۋاندىعىن تانىستىرىپ، ىلگەرىلەتۋ باعىتىندا جۇمىس ىستەيتىنىن ەسكە سالدى.
- ءبىز قازاقستاننىڭ الەمدىك ارەناداعى بىرەگەي زاماناۋي كەلبەتىن ساقتاپ، شەتەلدىك اۋديتورياعا كوشپەلى وركەنيەت مۇراسىن تانىستىرۋعا كوڭىل بولەمىز. قازىرگى احۋال مەن جاعدايدا ەلدىڭ جەتىستەرىن تانىتىپ، بەيبىتشىلىك پەن كەلىسىمدى نىعايتۋدا، حالىقتار اراسىنداعى دوستىق قارىم-قاتىناستى جولعا قويۋدا مادەنيەت پەن عىلىمنىڭ، ونەر مەن سپورتتىڭ ۇلەسى زور. جۇمساق كۇش قۇرالى دەپ اتالاتىن حالىقتار اراسىنداعى، مادەني، گۋمانيتارلىق ديپلوماتيانىڭ ماڭىزى ارتىپ كەلەدى، - دەگەن اقان راحمەتۋللين قازاقستاننىڭ «ىزگى نيەت» ەلشىلەرىنىڭ قاتارىن تولىقتىرعان 5 ادامعا قانداي مىندەت جۇكتەلەتىنىن ايتتى.
وسى مارتەبەگە يە بولعان ديماش قۇدايبەرگەننىڭ بۇگىنگى ءىس-شاراعا كەلمەگەنىمەن وزىنە جۇكتەلگەن ميسسيانى ورىنداۋعا كىرىسىپ كەتكەنىن اتاپ ءوتتى.
- سىزدەر قازاقستاندى ءتۇرلى سالالاردا ءوز كۇشتەرىڭىزبەن دارىپتەپ جۇرسىزدەر. سيفرلىق بايلانىس تىلىندە سىزدەردى ينفليۋەنسەرلەر دەپ اتايدى. ال ءبىز سىزدەرگە «ىزگى نيەت» ەلشىسى دەيتىن جوعارى مارتەبەنى سەنىپ تاپسىرعىمىز كەلەدى. بۇل سىزدەرگە تەك ابىروي عانا ەمەس، ۇلكەن جاۋاپكەرشىلىك جۇكتەيدى. وسى جوبا ارقىلى ءبىز الەمگە قازىرگى قازاقستاننىڭ جەتىستىكتەرىن، مادەنيەتى مەن ونەرىن، عىلىمي پروگرەسى مەن سپورتتىق جەتىستىكتەرىن، شىعارماشىلىقتاعى ۇتىمدى شەشىمدەرى مەن ەلدىڭ تۋريستىك الەۋەتىن تانىستىرۋعا نيەتتىمىز»، - دەدى سىرتقى ىستەر ءمينيسترىنىڭ ءبىرىنشى ورىنباسارى.
«ىزگى نيەتى» ەلشىسى اتانعان ارىپتەسىمىز مايا بەكبايەۆا قازاق حالقىنىڭ ۇلتتىق قۇندىلىقتارى قازىرگى الەمدە وتە وزەكتى بولىپ تۇرعانىن ايتادى.
- وتانىم قازاقستاندى سىرتقا «ىزگى نيەت» ەلشىسى رەتىندە تانىتۋ مەن ءۇشىن ءارى قۇرمەت ءارى قۋانىش. ەلىمىزدىڭ تاريحى شىن مانىندە بىرەگەي ءارى باي. ونىڭ وزەگىندە بەيبىتشىلىك پەن تۇتاستىق جاتىر. مەنىڭ الدىمدا ىزگى نيەت ەلشىسى رەتىندە حالقىمىزدىڭ نەگىزگى قۇندىلىقتارىن ىلگەرىلەتۋ مىندەتى تۇر. مەنىڭ ويىمشا، ول قۇندىلىقتار قازىرگى الەمدە وتە ماڭىزدى، - دەدى بەكبايەۆا.
ايتا كەتەيىك، بۇعان دەيىن ديماش قۇدايبەرگەن ۇزدىك مادەنيەت قايراتكەرى اتانعانىن جازعان ەدىك.
سونداي-اق، جاقىندا مايا بەكبايەۆانىڭ جاڭا البوم-كىتابى جارىق كورگەنى حابارلاندى.
