ديماش قازاقستان ءانۇرانىن شىرقاۋدىڭ ەڭ ۇزدىك ۇلگىسىن كورسەتتى - مالايزيا اۋەجايىنىڭ قىزمەتكەرى ەكسكليۋزيۆتى سۇحبات بەردى

قوعام مۇنى «ديماشتىڭ اسەرى» دەپ باعالادى. وسى ورايدا Kazinform اگەنتتىگى 32 جاستاعى ازيزي زامحاريدى تاۋىپ، قازاقستان تۋرالى وي-پىكىرىن سۇرادى.

«مالايزيانىڭ ميري قالاسىندا تۋعانمىن. كۋالا-لۋمپۋردا مالايزيا ۋنيۆەرسيتەتىندە قولدانبالى حيميا باكالاۆرى دارەجەسىن الدىم. قازىرگى ۋاقىتتا كۋالا-لۋمپۋر حالىقارالىق اۋەجايىنىڭ Duty Free ايماعىندا ساتۋ بويىنشا كەڭەسشىمىن. ۆوكالمەن كاسىبي تۇردە اينالىسپايمىن. كۇندەلىكتى جۇمىستا نەمەسە ۇيىمدە اندەتىپ جۇرەمىن جانە شەتەلدىك ءانۇرانداردى دۇرىس شىرقاۋ ءۇشىن ارىپتەردىڭ قالاي دىبىستالاتىنىن زەرتتەيمىن»، - دەيدى ازيزي Kazinform اگەنتتىگىنە بەرگەن سۇحباتىندا.

ازيزي 15 جاسىنان باستاپ الەمنىڭ ءتۇرلى ەلدەرىنىڭ ءانۇراندارىن جاتتاۋدى ادەتكە اينالدىرعان. قازىرگە دەيىن 40 تان استام ەلدىڭ ءانۇرانىن ۇيرەندى.

«قازاقستان ءانۇرانىن 2014-جىلى YouTube جەلىسىنەن تاپتىم. كەيىنىرەك ديماشتى تاني باستادىق. مەنىڭشە، ديماشتىڭ ورىنداۋى - قازاقستان ءانۇرانىن شىرقاۋدىڭ ەڭ ۇزدىك ۇلگىسى. جانە مەن ونىڭ ستيلىنە ەلىكتەيمىن. جاقىندا Spotify جەلىسىنەن ديماشتىڭ «Smoke» ءانىن تىڭدادىم. داۋىسى عاجاپ»، - دەدى ول.

ازيزي قازاقستاندا TikTok جەلىسىندە تاراعان ۆيرۋستى بەينەروليك جونىندە پىكىر ءبىلدىردى جانە تاڭدانىسىن جاسىرمادى.

«اۋەجاي مەنەدجەرى مەنى قازاقستان ەلشىلىگى ىزدەپ جاتقانىن، ۆيدەومنىڭ كەڭ تارالىپ كەتكەنىن ايتقاندا، راسىندا دا تاڭ قالدىم. وعان دەيىن دە قازاقستان تۋرالى - گەوگرافياسى، ساياساتى، تاعامدارى جانە تاريحى تۋرالى كوپ وقىعانمىن. مەن ءۇشىن قازاقستان - «جاسىرىنىپ جاتقان ءىنجۋ-مارجانى» مول وراسان زور ەل جانە ونىڭ تۋريستىك الەۋەتى ۇلكەن. مەنىڭ كوپتەگەن وتانداستارىم قازاقستانعا قىدىرىپ بارعان. ماعان ازىرگە جول تۇسپەدى، ءبىراق قازاقستانعا بارعىم كەلەدى، قازاقشا ەتتىڭ ءدامى قانداي ەكەن دەپ ويلايمىن (كۇلدى). قازاقستاننىڭ ءانۇرانى ءسىزدىڭ ەلىڭىزدى تاماشا سيپاتتايدى دەپ ويلايمىن. بۇل ساپار ومىرىمدەگى ەڭ عاجاپ ساتتەردىڭ ءبىرى بولارىنا سەنىمدىمىن»، - دەيدى مالايزيالىق تىڭدارمان.

سونىمەن بىرگە، ازيزي الماتى مەن كۋالا-لۋمپۋر اۋە رەيسى اشىلعانىن، ەكى ەل اراسىنداعى جولاۋشىلار اعىنى كوبەيگەنىن اتاپ ءوتتى.

«مالايزيانىڭ ۇلكەن اۋەجايىندا ءارتۇرلى ادامدارمەن تىلدەسۋ مۇمكىندىگى بار. سويلەسۋ اياسى كەڭەيگەن سايىن ۇيرەنەتىن ءانۇراندار دا كوبەيە تۇسەدى. ءبارىن قالاي ەسىڭدە ساقتايسىڭ دەپ سۇراپ جاتادى. ۇمىتىپ قالماۋ ءۇشىن قايتالاپ تۇرۋ كەرەك. ۇنەمى ىزدەنىپ، ۇنەمى جاڭا دۇنيەلەردى وقۋعا تىرىسامىن»، - دەيدى ازيزي زامحاري.

ايتا كەتەيىك، بۇگىن پرەزيدەنت قاسىم-جومارت توقايەۆ قازاقتىڭ ءانۇرانىن ايتىپ جۇرگەن ديماشتىڭ شەتەلدىك جانكۇيەرلەرى جايلى پىكىر بىلدىرگەن ەدى.

بيىل جاڭا جىل مەرەكەسىندە ديماش قۇدايبەرگەن اقوردادا سيمفونيالىق وركەستردىڭ سۇيەمەلدەۋىمەن ءانۇرانىمىزدى شىرقاعان بولاتىن.

اۆتورايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى