ديماش پەن انتيكور ءتوراعاسى اسحات جۇماعالي ادالدىق تاقىرىبىن تالقىلادى
استانا. KAZINFORM - سىبايلاس جەمقورلىققا قارسى قىزمەت ءتوراعاسى اسحات جۇماعالي قازاقستاننىڭ حالىق ءارتىسى، حالىقارالىق ءانشى، كومپوزيتور، ديماش قۇدايبەرگەنمەن كەزدەستى.
كەزدەسۋ بارىسىندا اگەنتتىك ءتوراعاسى جەمقورلىقتىڭ الدىن الۋ بويىنشا قابىلدانىپ جاتقان شارالارمەن، سونداي-اق ەلدەگى سىبايلاس جەمقورلىققا قارسى مادەنيەتتى قالىپتاستىرۋعا ىقپال ەتەتىن اگەنتتىك جۇمىسىنىڭ اشىقتىعىن ارتتىرۋعا، نەگىزگى باعىتتارى مەن زاڭدىلىق قاعيداتتارىن نىعايتۋعا باعىتتالعان زاماناۋي ادىستەرمەن تانىستىردى.
اسحات جۇماعالي ونەردىڭ قوعامدا سىبايلاس جەمقورلىققا قارسى مادەنيەتتى قالىپتاستىرۋدا، ادالدىق پەن ادىلدىككە تاربيەلەۋدە، ادامداردىڭ دۇنيەتانىمىنا اسەر ەتۋدە جانە پاراساتتىلىق قاعيداتتارىن نىعايتۋدا ماڭىزدى ءرول اتقاراتىنىن اتاپ ءوتتى.
انتيكور ءتوراعاسى قوعامداعى جەمقورلىققا نولدىك توزىمدىلىكتى قالىپتاستىرۋ ماقساتىندا الدىن الۋ جۇمىستارىنا نازار اۋدارۋ ماڭىزدى ەكەنىن اتاپ ءوتتى.
ءوز كەزەگىندە ديماش قۇدايبەرگەن اتقارىلىپ جاتقان جۇمىستارعا، بولاشاعىمىزدىڭ يگىلىگى ءۇشىن سىبايلاس جەمقورلىققا قارسى ءىس- قيمىل ىسىنە قولداۋ ءبىلدىردى.
تاراپتار سىبايلاس جەمقورلىق دەڭگەيىن تومەندەتۋگە، مادەني جانە ءبىلىم بەرۋ باستامالارى ارقىلى پاراساتتىلىق قاعيداتتارىن ناسيحاتتاۋعا باعىتتالعان قوعامداعى زاڭدىلىق پەن ءتارتىپ قاعيداتتارىن ىلگەرىلەتۋ شەڭبەرىندەگى بىرلەسكەن جوبالاردى تالقىلادى.
كەزدەسۋ سوڭىندا اسحات جۇماعالي ديماش قۇدايبەرگەنگە ەلىمىزدىڭ مادەنيەتىن دامىتۋعا قوسقان ۇلەسى ءۇشىن ەرەكشە العىسىن ءبىلدىرىپ، شىعارماشىلىق قىزمەتىنە ۇلكەن تابىس پەن ساتتىلىك تىلەدى.
