ديماش ءۇيىن سۋ الىپ كەتكەن حالىققا كومەكتەسۋگە شاقىردى
استانا. KAZINFORM - قازاقستاندىق ءانشى ديماش قۇدايبەرگەن ەل ازاماتتارىن سۋ باسقان وڭىرلەرگە كومەك قولىن سوزۋعا ۇندەدى.
ول بۇل جايىندا Instagram پاراقشاسىندا جازدى.
- ناۋرىزدىڭ سوڭعى كۇندەرى كۇن كۇرت جىلىنىپ، اقتوبە وبلىسى ايماعىندا جانە ەلىمىزدىڭ تاعى ءبىرقاتار وڭىرىندە تەز ەرىگەن قار سۋى ساي- سالانى لەزدە تولتىرىپ، اۆتوكولىك جولدارىن شايىپ، بىرنەشە ەلدىمەكەندى سۋ باسىپتى. كوپ وتباسىلاردىڭ باسپاناسى تۇرۋعا جارامسىز بولىپ قالعان. سونداي- اق اقتوبە ايماعىندا وزەندەردەگى مۇز ەرىپ، سۋ قويمالارىنداعى سۋ دەڭگەيىنىڭ كوتەرىلىپ، وزەندەردىڭ ارناسىنان اسۋ ءقاۋپى جوعارى ەكەن. مۇنىڭ سەبەپ- سالدارىن قۇزىرلى مەكەمەلەر انىقتاپ، ماسەلەنىڭ ءتۇيىنىن شەشۋ جولدارىن ىزدەستىرە جاتار. مەملەكەت تاراپىنان ۇيلەرىن سۋ شايىپ كەتىپ، دالادا قالعان اعايىنعا تولىققاندى كومەك كورسەتىلەتىنىنە سەنىم مول، - دەيدى قابىرعاسى قايىسقان ورىنداۋشى.
ديماش قۇدايبەرگەن تاپ قازىرگى ساتتە قينالعانعا قول ۇشىن سوزۋ - ەڭ باستى پارىز ەكەنىن ەسكە سالدى.
- «وت پەن سۋ - ءتىلسىز جاۋ». سوندىقتان قىسىلتاياڭ ساتتە باۋىرلارىمىزعا قول ۇشىن سوزىپ، بىرلىگىمىزدى كورسەتەيىك، اعايىن! - دەپ قايىرىمدىلىققا ۇندەدى ءانشى.
اۆتور
جانات قاپالبايەۆا
