پەدوفيلدەرگە حيرۋرگيالىق كاستراتسيا جاسالۋى مۇمكىن بە
استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات ەلنۇر بەيسەنبايەۆ پەدوفيلدەرگە قاتىستى جازانى كۇشەيتۋدى تاعى دا تالاپ ەتىپ، بۇل قىلمىسقا قاتىستىلارعا حيرۋرگيالىق كاستراتسيا جاساۋ كەرەك ەكەنىن ايتتى.
اتاپ ايتقاندا، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن ىلىسپە قۇجات ءبىرىنشى وقىلىمدا قارالدى. جاڭا زاڭ جوباسىندا پەدوفيليا ءۇشىن ءومىر بويىنا باس بوستاندىعىنان ايىرۋ جازاسى ەسكەرىلگەن.
ە. بەيسەنبايەۆ پەدوفيلدەرگە حيرۋرگيالىق كاستراتسيا تۋرالى ۇسىنىسىن جەتكىزدى. دەپۋتاتتىڭ پايىمىنشا، وسى نورماعا قاتىستى ۇكىمەت ناقتى ۇستانىمىن تانىتپادى جانە بۇل تۇزەتۋدى قولدامادى.
«زاڭ جوباسىن ەكىنشى وقىلىمعا دەيىن دايىنداۋ كەزىندە پەدوفيلدەرگە حيرۋرگيالىق كاستراتسيا بويىنشا ۇكىمەت ءوزىنىڭ تۇزەتۋىن قايتا قاراستىرۋعا دايىن با؟»، - دەپ سۇرادى ە. بەيسەنبايەۆ.
ءوز كەزەگىندە ىشكى ىستەر ءمينيسترىنىڭ ورىنباسارى يگور لەپەحا ەندى پەدوفيلدەرگە ءومىر بويىنا باس بوستاندىعىنان ايىرۋ جازاسى قولدانىلاتىنىن اتاپ ءوتتى.
«ەندى پەدوفيلدەرگە قاتىستى ءومىر بويىنا باس بوستاندىعىنان ايىرۋ جازاسى ناقتى قولدانىلادى. ياعني، ەگەر ول ءومىر بويىنا باس بوستاندىعىنان ايىرىلسا، حيرۋرگيالىق كاستراتسياعا جاساۋدىڭ قاجەتى بار ما؟ ەكىنشىدەن، ازاپتاۋعا قارسى كونۆەنتسياعا قازاقستان قوسىلعان. بۇل تۇرعىدا سۇراقتى ىشكى ىستەر مينيسترلىگىنە ەمەس، ادىلەت مينيسترلىگى مەن باس پروكۋراتۋراعا باعىتتاعان دۇرىس بولادى. ۇشىنشىدەن، وسى مەديتسينالىق سۇراققا دەنساۋلىق ساقتاۋ مينيسترلىگى جاۋاپ بەرگەنى ءجون بولار، ياعني كاستراتسيانى كىم جۇزەگە اسىرادى جانە ونى قالاي اتقارادى؟ جالپى، مەن ۇكىمەت ءۇشىن جاۋاپ بەرە المايمىن. ءبىراق تۇزەتۋدى ءقازىر جولداساڭىزدار، ءبىز ونى بارلىق ورگانداردىڭ قاتىسۋىمەن تالقىلايمىز»، - دەدى يگور لەپەحا.
