پەدوفيل حيميالىق كاستراتسيادان ءولىپ كەتۋى مۇمكىن بە
حيميالىق كاستراتسيانىڭ دا ءدارى-دارمەك سەكىلدى جاناما اسەرى مەن قارسى كورسەتىلىمدەرى بار، دەپ حابارلايدى Kazinform.
«حيميالىق كاستراتسيا جاسالاتىن پەدوفيل ءبىرىنشى راسىمنەن كەيىن كەمىندە 6 ايدا 1 رەت تەكسەرۋدەن وتەدى. اتاپ ايتقاندا، گورموندار دەڭگەيىن انىقتاۋ، فيزيكالىق دەرەكتەر جانە جالپى كلينيكالىق تالداۋ جاساۋ. حيميالىق كاستراتسيا جاسالعان ادامعا قازاقستان رەسپۋبليكاسىنىڭ حالقىنا پسيحيكالىق دەنساۋلىق سالاسىندا مەديتسينالىق-الەۋمەتتىك كومەك كورسەتۋدى ۇيىمداستىرۋ ستاندارتىنا سايكەس پروتسەسس اياقتالعاننان كەيىن ادامنىڭ دەنساۋلىعىنا ديناميكالىق باقىلاۋ جۇرگىزىلەدى»، - دەلىنگەن دەنساۋلىق ساقتاۋ مينيسترلىگىنىڭ Kazinform ءتىلشىسىنىڭ ساۋالىنا بەرىلگەن جاۋاپتا.
اقپاراتتا ايتىلعانداي، پەدوفيلگە حيميالىق كاستراتسيا جاساعان كەزدە ول شوك الۋى مۇمكىن.
«حيميالىق كاستراتسيا جاساۋدا قولدانىلاتىن انتياندروگەندى پرەپاراتتى قابىلداۋ جىنىستىق قاتىناستىڭ تومەندەۋىنە اكەلەدى. الايدا، حيميالىق كاستراتسيانىڭ دا ءدارى-دارمەك سەكىلدى جاناما اسەرلەرى مەن قارسى كورسەتىلىمدەرى بار. انافيلاكتيكالىق شوك تۇرىندەگى جىلدام اللەرگيالىق رەاكسيا بولعان جاعدايدا، ءولىمدى جوققا شىعارۋعا بولمايدى. بۇل جەكە ادامنىڭ توزىمدىلىگىنە بايلانىستى جانە پوپۋلياتسيادا وتە سيرەك كەزدەسەتىن ەرەكشە جاعداي»، - دەپ ءتۇسىندىردى ۆەدومستۆودان.
ايتا كەتەيىك، بيىل ەلىمىزدە 32 پەدوفيلگە حيميالىق كاستراتسيا جاسالعان.
