دەپۋتاتتار ءۇي جانۋارلارىن اسىرايتىن زەينەتكەرلەرگە جاردەماقى تولەۋدى ۇسىندى
ەل دەپۋتاتتارىنىڭ پىكىرىنشە، بۇل شارا ەلدەگى قاڭعىباس ءيت- مىسىق ماسەلەسىن شەشۋگە كومەكتەسەدى.
رەسەي مەملەكەتتىك دۋماسىندا ءۇي جانۋارلارىن اسىرايتىن زەينەتكەرلەرگە 20 مىڭ رۋبل كولەمىندە اي سايىنعى جاردەماقى تولەۋ ۇسىنىسى قاراستىرىلىپ جاتىر. دەپۋتاتتاردىڭ پىكىرىنشە، بۇل شارا ەلدەگى قاڭعىباس جانۋارلار ماسەلەسىن شەشۋگە كومەكتەسەدى.
بۇل باستامانى مەملەكەتتىك دۋما دەپۋتاتى ۆلاديمير كوشەليەۆ كوتەردى. ونىڭ ايتۋىنشا، جالعىزباستى زەينەتكەرلەر اسىرايتىن ءۇي جانۋارلارىنا ارنايى جاردەماقى ءبولۋ قاجەت.
ول قاڭعىباس جانۋارلاردىڭ سانىن ازايتۋدىڭ ءتيىمدى جولى - ولاردى جالعىزباستى زەينەتكەرلەرگە بەرۋ ەكەنىن اتاپ ءوتتى.
«ل د پ ر-دىڭ باستاماسىن تالقىلايىق: جالعىز تۇراتىن زەينەتكەرلەردىڭ اسىراۋىنداعى ءۇي جانۋارلارىنا جاردەماقى تولەۋ قاجەت. ارينە، بۇل بىرنەشە ونداعان يت پەن مىسىقتى ءبىر پاتەردە ۇستاۋعا رۇقسات بەرۋ دەگەندى بىلدىرمەيدى»، - دەدى دەپۋتات.
كوشەليەۆتىڭ مالىمەتىنشە، 2024 -جىلى رەسەيدە اگرەسسيۆتى جانۋارلاردىڭ شابۋىلىنان 237 مىڭ ادام زارداپ شەككەن.
