دەپۋتاتتار بيزنەستى تەكسەرۋگە موراتوريدى تاعى ۇزارتۋدى سۇرادى

ءماجىلىس دەپۋتاتى اسقار سادىقوۆ ساۋالىن پرەمەر-مينيستر ءاليحان سمايىلوۆقا جولدادى.

ونىڭ ايتۋىنشا، 2019-جىلى ميكرو جانە شاعىن بيزنەستى تەكسەرۋگە 3 جىلعا موراتوري جاريالاندى. سودان كەيىن ول تاعى ءبىر جىلعا ۇزارتىلعان.

«كوروناۆيرۋس پاندەمياسى ءورشىپ تۇرعاندا جانە كارانتيننەن كەيىن موراتوري كاسىپكەرلەرگە ايتارلىقتاي كومەك بولدى. قۇقىقتىق ستاتيستيكا جانە ارنايى ەسەپكە الۋ كوميتەتىنىڭ دەرەگىنشە، 2019-جىلى شاعىن جانە ميكروبيزنەس 128 مىڭنان استام رەت تەكسەرىلدى. وسىلايشا، 2020-جىلى ولاردىڭ سانى 5 ەسە قىسقاردى. موراتوريدىڭ ەنگىزىلۋى مەملەكەت تاراپىنان بيزنەستى قولداۋعا كورسەتىلگەن ءتيىمدى شارالاردىڭ ءبىرى بولدى»، - دەدى دەپۋتات.

سونىمەن قاتار اسقار سادىقوۆ شاعىن جانە ورتا بيزنەس سۋبەكتىلەرىنىڭ نەبارى %0,2 ىن قۇرايتىن ورتا كاسىپكەرلىك وسى سالاداعى ءوندىرىستىڭ %20 ىن قالىپتاستىرىپ وتىرعانىن اتاپ ءوتتى. ونىڭ پىكىرىنشە، ەلىمىزدە ورتا بيزنەس تە تەكسەرىلمەۋى كەرەك.

«مەملەكەتتىك قولداۋ شارالارىنىڭ بارلىعى، ءتىپتى موراتوريدىڭ ءوزى شاعىن جانە ميكروبيزنەسكە باعىتتالعان. الايدا ورتا بيزنەستى قولداۋعا قاتىستى ەشتەڭە جوق. وسىعان بايلانىستى تابىسى بار شاعىن كاسىپورىندار ورتا بيزنەسكە وتكىسى كەلمەيدى»، - دەدى ول.

«اق جول» فراكسياسىنىڭ دەپۋتاتتارى كاسىپكەرلەردى تەكسەرۋگە موراتوريدى 2024-جىلدىڭ سوڭىنا دەيىن ۇزارتۋدى ۇسىندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى