دەپۋتاتتار اقپاراتقا قول جەتكىزۋگە قاتىستى زاڭ جوباسىنداعى تۇزەتۋگە قارسى شىقتى
استانا. KAZINFORM - بۇگىن پارلامەنت ماجىلىسىندە اقپاراتقا قول جەتكىزۋگە قاتىستى زاڭ جوباسىن تانىستىرۋ كەزىندە دەپۋتاتتار وسى قۇجاتتاعى جاڭا تۇزەتۋگە نارازىلىق ءبىلدىردى.
دەپۋتات ابزال قۇسپان بۇل جوبانى ءماجىلىستىڭ زاڭناما جانە سوت-قۇقىقتىق رەفورما كوميتەتىندە قاراستىرۋ كەزىندە ۇلكەن سىنعا ۇشىراعانىن ايتتى. ياعني، قۇجات جوباسىندا دەپۋتاتتار زاڭ شىعارۋ باستاماسىن قولدانعان جاعدايدا، مىندەتتى تۇردە ۇكىمەتتىڭ وڭ قورىتىندىسىن الۋ نورماسى قيسىنسىز.
«نەگە؟ بۇل ادەتتەگى ءبىر زاڭدارعا قاراما-قايشى كەلسە ءبىر ءجون. بۇل جەردە كونستيتۋتسيانىڭ نورماسى بۇزىلىپ وتىر. اتاپ ايتقاندا، كونستيتۋتسياداعى 61-باپتىڭ 1-تارماعىندا زاڭ شىعارۋ باستاماسى پرەزيدەنتكە، ۇكىمەتكە جانە پارلامەنت دەپۋتاتتارىنا تيەسىلى دەپ انىق كورسەتىلگەن. ال مىنا تانىستىرىلعان زاڭ جوباسىنداعى ۇسىنىستى الىپ قاراساق، وندا دەپۋتاتتاردىڭ زاڭ شىعارۋ باستاماسىن شەكتەۋ تىكەلەي كوزدەلگەن. سونىمەن قاتار پرەزيدەنتتىڭ «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» دەگەن فورمۋلاسىنا نەگىزدەلگەن باستاماسىنا تىكەلەي قايشى كەلىپ وتىر. بۇل باستاماعا سايكەس ۇكىمەت پارلامەنتتىڭ الدىندا ەسەپ بەرۋى كەرەك بولسا، مۇندا كەرىسىنشە - پارلامەنت دەپۋتاتتارىن زاڭ شىعارۋشىلىق باستامادا ۇكىمەتكە باعىندىرىپ قويماقشى»، - دەدى ا. قۇسپان.
Kazinform تىلشىلەرىنە بەرگەن سۇحباتىندا دەپۋتات ابزال قۇسپان بۇگىن تانىستىرىلعان زاڭ جوباسىندا پارلامەنت دەپۋتاتتارى ازىرلەگەن قۇجات جوبالارى بويىنشا قازاقستان ۇكىمەتىنىڭ قورىتىندىسىن ەسكەرە وتىرىپ، قوعامدىق تالقىلاۋ راسىمدەرىن وتكىزۋ مىندەتتى سانالاتىنى جازىلعانىن ايتتى.
«زاڭ شىعارۋ باستاماسى تەك ءۇش سۋبەكتىگە عانا بەرىلگەن. وسى جەردە ۇكىمەت زاڭ شىعارۋ باستاماسىن ءىشىنارا شەكتەگىسى كەلەدى. دەپۋتاتتار زاڭ شىعارۋ باستاماسىن قولدانعان جاعدايدا، مىندەتتى تۇردە ۇكىمەتكە جولداپ، ۇكىمەتتىڭ وڭ قورىتىندىسى بولعاندا عانا شىعارا الاتىنداي نورمانى ەنگىزىپ قويعان. زاڭ جوباسىنداعى وسى ۇسىنىسقا قارسىمىز»، - دەدى ابزال قۇسپان.
دەپۋتاتتىڭ پىكىرىنشە، زاڭ جوباسىنداعى بۇل نورمانى پارلامەنت قابىلدامايدى.
ءوز كەزەگىندە دەپۋتات اسحات ايماعامبەتوۆ تە قۇجاتتا ويعا قونىمسىز نورمالار بار ەكەنىن راستادى.
مادەنيەت جانە اقپارات ۆيتسە-ءمينيسترى دانيار قادىروۆ بۇل نورمانى ۇسىنار الدىندا وسى اقپاراتقا قول جەتكىزۋ سالاسى زەردەلەنگەنىن ايتتى.
«سوندا دەپۋتاتتاردىڭ زاڭناما باستاماسىن جاسار الدىندا وسى ب ا ق وكىلدەرىمەن، ۇكىمەتتىك ەمەس ۇيىمدارمەن، بەلسەندىلەرمەن تالقىلاۋ مۇمكىندىگىن بەرۋ رەتىندە ۇسىندىق. وسى ماقساتتى عانا كوزدەدىك»، - دەدى ۆيتسە-مينيستر.
