دەپۋتات وتاندىق فيلمدەرگە ارنالعان «كورسەتىلىم كۆوتاسىن» بەلگىلەۋدى ۇسىندى
ءماجىلىس دەپۋتاتى نۇرگۇل تاۋ پرايم-تايم ۋاقىتتارىندا قازاقستاندا شىعارىلعان كينولارعا ارنالعان كورسەتىلىم كۆوتاسىن ەنگىزۋدى ۇسىندى، دەپ حابارلايدى Kazinform.
«قازاقستاندا كينوتەاتر تاپشىلىعى بايقالدى. رەسمي ستاتيستيكاعا جۇگىنسەك، ەلىمىزدەگى ءىرى قالالاردى قوسپاعاندا، ءبىر وبلىسقا ورتاشا ەسەپپەن 4 كينوتەاتردان كەلىپ تۇر. بۇل - شالعاي وڭىرلەردە كينو سالاسىنداعى كاسىپكەرلىكتى دامىتۋعا كەدەرگى كەلتىرۋدە ءارى وتاندىق كينو تۋىندىلارىن اۋىلداعى اعايىنعا كورسەتۋگە قيىندىق تۋدىرىپ تۇر. ءبىز بۇل ماسەلە بويىنشا، تۇرعىلىقتى حالىق سانىن ەسكەرە وتىرىپ، كينوتەاترى جوق اۋدانداردا ۇكىمەتتىڭ ىقپالىمەن جانە كاسىپكەرلەردىڭ قولداۋىمەن كينوتەاترلار اشۋدى ۇسىنامىز»، - دەدى دەپۋتات.
ايتۋىنشا، قازاقستاندىق كينو تۇسىرۋشىلەر ءوز فيلمدەرىن ۇلكەن ەكراندا كورسەتۋ ءۇشىن «Sulpak» «Cinema»، «مەلومان» سياقتى ءىرى امەريكالىق كينوستۋديالاردىڭ وكىلدەرىنە جۇگىنۋگە ءماجبۇر.
«بۇل جاعداي، اتالعان رەسمي وكىلدەردىڭ كينوتەاترلارداعى بارلىق سەانستاردىڭ ۋاقىتتارىن الدىن-الا برونداپ جانە كەلىسىپ قويۋىنا بايلانىستى تۋىنداپ وتىر. وتاندىق كينو تۇسىرۋشىلەردى قولداۋ ماقساتىندا بارلىق كينوتەاترلاردىڭ سەانستارىندا، ونىڭ ىشىندە پرايم-تايم ۋاقىتتارىندا، قازاقستاندا شىعارىلعان كينولارعا ارنالعان كورسەتىلىم كۆوتاسىن ەنگىزۋدى ۇسىنامىز. اتالعان كۆوتانى قازاقستاننىڭ حالىقارالىق مىندەتتەمەلەرىن جانە وتاندىق فيلمدى كورۋ ءۇشىن باستاپقى ۋاقىتتا ساتىلعان بيلەتتەردىڭ جالپى سانىن ەسكەرە وتىرىپ، ەنگىزگەن ءجون»، - دەدى نۇرگۇل تاۋ.
