دەپۋتات وتاندىق انيماتسيا تۋرالى: بالالار جات يدەولوگيا قۇربانىنا اينالدى

«جاس ۇرپاقتى ۇلتىمىزدىڭ ءداستۇرلى قۇندىلىقتارىنا سايكەس تاربيەلەۋ تەتىگى - وتاندىق انيماتسيانى دامىتۋ. بۇگىندە، قازاقى اۋىلدا تۋىپ، تانىمى قالىپتاسىپ كەلە جاتقان جاسوسپىرىمدەردىڭ ءتىلى ورىس نەمەسە اعىلشىن تىلىندە شىعۋدا. بۇعان اسەر ەتەتىن فاكتور كوپ. ونىڭ ىشىندەگى ەڭ نەگىزگىسى YouTube پەن TikTok-تىڭ ىقپالى زور. ا ق ش، گەرمانيا، فرانسيا، انگليا، جاپونيا جانە قىتاي انيماتسيا سالاسىنا ستراتەگيالىق ماڭىز بەرىپ، ميلليونداپ، ءتىپتى ميللياردتاپ قارجى قۇيادى. شىعىس ازيا ەلدەرى - كورەيا، جاپونيا مەن قىتاي انيماتسياسى ۇلتتىق سيپاتتا دامىسا، ەۋروپا مەن ا ق ش- تا كوممەرتسيالىق باعىتتا بيزنەستىڭ ءبىر قۇرالىنا اينالدى»، - دەدى دانابەك يسابەكوۆ.

حالىق قالاۋلىسىنىڭ ايتۋىنشا، رەسەيلىك بالالارعا ارنالعان انيماتسيالى فيلمدەردى يدەولوگيا قۇرالى رەتىندە پايدالانۋ ۇردىسكە اينالعان.

«ونىڭ ايقىن مىسالى، 2020 -جىلى ماسكەۋ بيلىگى مۋلتيمەديا سالاسىن سۋبسيديالاۋعا 300 ميلليون رۋبل ءبولىپ، انيماتسياسىنىڭ سانى مەن ساپاسىن ارتتىرۋعا ءمان بەردى. سونىڭ اسەرىنەن بولار، رەسەي 2010 -جىلى 25 مىڭ مينۋتقا جەتەتىن مۋلتفيلم شىعارسا، 2020 -جىلى 55 مىڭ مينۋتتان اسىردى. رەسەي جىلىنا 200 ساعات انيماتسيالىق ءونىم ۇسىنسا، قىتاي 3 مىڭ ساعات ەفير دايىندايدى»، - دەيدى ول.

سونىمەن قاتار، دەپۋتات پەكين انيماتسيا سالاسىنا ەرەكشە ەكپىن بەرىپ، انيماتسيانىڭ ۋاقىتىن 300 مىڭ مينۋتقا جەتكىزىپ، الەمدە كوشباسشى ەكەنىن ايتتى.

«ءبىزدىڭ بالالار جات ەل يدەولوگياسىنىڭ قۇربانىنا اينالىپ، ءوزىنىڭ ۇلتتىق بولمىسىنا جات، ساناسىنا ساي كەلمەيتىن ونىمدەردى تۇتىنۋدا. ويتكەنى ءبىزدىڭ ەل انيماتسيا سالاسىندا ماقتانا المايدى. قازىر جاسوسپىرىمدەر شەتەل انيماتسياسىن ءوزىنىڭ ءتول تۋىندىسىنداي تۇتىنىپ، قالىڭ قازاق وتىرعان اۋىلداعى بەسىك بالالارىنىڭ ءتىلى نە ورىس، نە اعىلشىن تىلىندە شىعۋدا. ويتكەنى وتاندىق انيماتسيادا تىڭ وي، جاڭاشىلدىق جاعى كەمشىن. بۇرىنعى سۇرلەۋمەن ءجۇرىپ، كۇردەلى، فيلوسوفيالى تۋىندىلار ۇسىنادى. بالالار مۇنداي تۋىندىنى قابىلداي المايدى ءارى قىزىقپايدى»، - دەپ تولىقتىردى د. يسابەكوۆ.

ودان ءارى ءماجىلىس دەپۋتاتى ۇكىمەت ۇلتتىق انيماتسيا ونىمدەرىن سۋبسيديالاۋ كولەمىن ارتتىرۋى كەرەك دەگەن ۇسىنىس ءبىلدىردى.

«ەلدەگى مۋلتيپليكاتور مامانىن دايارلايتىن وقۋ ورىندارى 2D انيماتسياسى بويىنشا ءبىلىم بەرۋمەن شەكتەلمەي، 3D فورماتتى يگەرۋگە باسىمدىق بەرۋى مىندەت. كاسىبي سەناريست پەن تالانتتى سۋرەتشىلەر جانە IT ماماندار بىرلەسە جۇمىس ىستەپ، ساپالى انيماتسيالىق ونىمدەر دايىنداۋدى جولعا قويۋ ماڭىزدى. قازىر بالالار تەز قوزعالاتىن، ارى كەتسە 10-15 سەكۋندتا سوزىلاتىن، ءوزىنىڭ دۇنيەتانىمى مەن كوزقاراسىنا ساي كەلەتىن، بوياۋى قانىق دۇنيەلەرگە قىزىعادى. ەندەشە، جاسوسپىرىمدەردىڭ تانىم- تۇسىنىگىنە ساي قىسقا مەتراجدى انيماتسيا ونىمدەرىن كوبەيتۋ ماڭىزدى»، - دەدى ول.

پايىمداۋىنشا، انيماتسيا سالاسىن زاماناۋي تالاپتارعا ساي دامىتۋ ءۇشىن IT مامانداردى تارتا وتىرىپ، يدەولوگتار مەن پسيحولوگتار، كەرەك بولعان جاعدايدا، پەداگوگتاردى تارتۋدى ويلاستىرۋ وزەكتى.

«الەمدىك الپاۋىت Disney سىندى ساپالى ونىمدەر ءتۇسىرۋ مۇمكىن ەمەس. مادەنيەت جانە اقپارات مينيسترلىگى مەن وقۋ- اعارتۋ مينيسترلىگى بىرىگىپ، وتاندىق انيماتسيانى دامىتۋدا كونتسەپتسيا دايىنداۋى ماڭىزدى»، - دەپ قورىتىندىلادى دەپۋتات.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى