دەپۋتات تيك-توكتى شەكتەۋدى ۇسىندى: اسەرى اتوم بومباسىنان كەم بولماي تۇر

- بۇگىنگى تاڭدا بالالاردىڭ الىپپەسى - الەۋمەتتىك جەلى، ەمىزىگى - TikTok، بەسىك جىرى - Instagram دەسەك ارتىق بولماس. ادامزات بالاسىن وتىرعىزىپ-تۇرعىزعان وسى قۇبىلىستاردىڭ اسەرى - اسىرەلەپ ايتساق اتوم بومباسىنان كەم بولماي تۇر. ءسوز جوق، قازىر - اقپاراتتىق عاسىر. الەۋمەتتىك جەلىلەر ءومىرىمىزدىڭ اجىراماس بولىگىنە اينالدى. پايدالى جاعى دا جوق ەمەس. الايدا، ۇلتتىق تاربيە مەن ءداستۇر-سالتىمىزدىڭ ۋىقتارىن تالقانداپ، اقىل توقتاتپاعان، جاقسى مەن جاماندى ءالى تولىق اجىراتىپ ۇلگىرمەگەن بالالار مەن جاسوسپىرىمدەردى مەڭدۋانا جەگەندەي مەڭىرەۋ الەمگە باستاپ بارا جاتقان جاعدايدىڭ الدىن الماساق وپىق جەيمىز، - دەدى ج. ءاشىمجان پرەمەر-مينيستر ولجاس بەكتنوۆتىڭ اتىنا جولداعان ساۋالىندا.

ونىڭ ايتۋىنشا، بالالار مەن جاسوسپىرىمدەر اراسىندا TikTok كەڭىنەن تانىمال. سوڭعى ەكى جىلدا 14,1 ميلليون قازاقستاندىق تىركەلىپتى. بۇل جەلىنىڭ نەگىزگى تۇتىنۋشىلارى دا - سول بەسىكتەن بەلى شىقپاعان بالالار مەن جاستار. وندا پايدالى كونتەنتتەن گورى، جاستارعا تەرىس اسەر ەتەتىن زياندى اقپاراتتار ءورىپ ءجۇر. قۇمار ويىنداردى جارنامالاۋ، ستريمدەر ارقىلى ادەپسىز ارەكەتتەر كورسەتۋ، بوقاۋىز سوزدەر، پورنوگرافيا، سۋيتسيدكە شاقىرۋ، ءدىني ۋاعىزداردىڭ وڭدى-سولدى تارالۋى، بۋللينگ، تىيىم سالىنعان زاتتاردىڭ جارناماسى سەكىلدى تەرىس ارەكەتتەرگە شاقىراتىن لاس اقپاراتتار وسى TikTok ارقىلى تارالىپ وتىر.

- جاسوسپىرىمدەردىڭ TikTok-تان كورگەنىن قايتالاپ، جاعىمسىز قىلىق پەن ادەپسىز ىسكە ءۇيىر بولىپ بارا جاتقانى دا جاسىرىن ەمەس. ماسەلەن، «مىسىق سەرۋەنى» دەپ اتالاتىن چەللەندجدى مىڭداعان جاس قايتالاسا، وعان قاتىسۋشىلار پوديۋم مودەلىندەي كوشەدە ءوتىپ بارا جاتقان ادامداردىڭ الدىندا ءجۇرۋى ءتيىس. ءمان-ماعىناسى جوق چەللەندجدىڭ قارالىمى 500 ميلليوننان اسقان. راسىندا، قازىرگى تاڭدا ۇرپاق تاربيەسىمەن تىكەلەي الەۋمەتتىك جەلىلەر اينالىسىپ كەلەدى. سونىڭ سالدارىنان ۇلتتىق قۇندىلىقپەن سۋسىنداماعان جاس ۇرپاق ءوسىپ كەلەدى. وسىنى ەسكەرىپ الەم ەلدەرى مۇنىڭ ودان ءارى ەتەك الۋىنا جول بەرمەۋ ماقساتىندا تيك-توكقا شەكتەۋ قويۋ نەمەسە ونداعى كونتەنتكە باقىلاۋدى كۇشەيتۋدى قولعا الىپ جاتىر، - دەدى دەپۋتات.

ونىڭ سوزىنە قاراعاندا، قازاقستاندا جەدەلدەتىپ TikTok-قا شەكتەۋ قويۋ ماسەلەسىن قاراستىرۋ كەرەك. ويتكەنى، TikTok-تى شامادان تىس قولدانۋدىڭ پسيحولوگيالىق الەۋمەتتىك جانە اكادەميالىق سالدارى، بالانىڭ ساناسى مەن دەنساۋلىعىنا كەرى اسەرى از ەمەس. ءتىپتى، وفتالمولوگ دارىگەرلەر تەلەفونعا تەلمىرگەن بالالاردىڭ اراسىندا كەيىنگى بەس جىلدا كوز اۋرۋلارى كۇرت كوبەيگەنىن جاريالاعان.

- سوندىقتان ۇرپاعىمىزدى TikTok-تان كەلەر ازعىندىقتان اراشالاپ قالۋ ءۇشىن وسى ماسەلەنى تاعى كوتەرۋىمىزگە تۋرا كەلىپ وتىر. سوندىقتان، ۇكىمەتكە كەلەسى شارالاردى قولعا الۋدى ۇسىنامىن. بىرىنشىدەن، TikTok-تاعى ادەپكە، ۇلتتىق قۇندىلىقتارعا، ءداستۇرىمىز بەن سالتىمىزعا قايشى كەلەتىن، بالالاردىڭ ساناسىن ۋلايتىن، تەرىس ادەتتەرگە شاقىراتىن بارلىق كونتەنتكە شەكتەۋ قويۋ كەرەك. ەكىنشىدەن، ەلىمىزدە TikTok-تى كامەلەتتىك جاسقا تولماعان بالالاردىڭ پايدالانۋىنا قاتاڭ شەكتەۋ قويۋ نەمەسە مۇلدەم تىيىم سالۋ تەتىكتەرىن قاراستىرۋ قاجەت دەپ ەسەپتەيمسىز، - دەدى جاناربەك ءاشىمجان.

بۇعان دەيىن TikTok-تاعى قىسقا ۆيدەولاردىڭ ميعا اسەرى تۋرالى جازعان ەدىك.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى