دەپۋتات كوللەدجدەردە شاباندوز بەن اتبەگى دايىنداۋدى ۇسىندى

ۇلتتىق سپورت جوعارى مەكتەبى ءبىر جىلدىق جۇمىسىن قورىتىندىلاعان جيىندا ءماجىلىس دەپۋتاتى امانجول ءالتاي وسىنداي دەرەك كەلتىردى.

- ارامىزدا تۋريزم جانە سپورت مينيسترلىگىنىڭ وكىلى وتىر. ۇلتتىق سپورتقا بولىنەتىن قارجىنىڭ كولەمىن كوبەيتۋ كەرەك. لەگيونەرلەردىڭ قالتاسىن قامپايتقانمەن سپورت دامىمايدى. مىسالى ءبىر عانا شىمكەنتتەگى فۋتبول كلۋبىنا بولىنەتىن قارجى جالپى سپورتقا بولىنەتىن قاراجاتتان بىرنەشە ەسە كوپ. سوندىقتان ۇلتتىق بولمىسىمىزدى، ءتول ديدارىمىزدى ايقىندايتىن ۇلتتىق سپورتتان قارجى ايامايىق، - دەدى ول.

دەپۋتاتتىڭ ايتۋىنشا، كەيبىر وڭىرلەردە ۇلتتىق سپورت سايىستارىن وتكىزۋگە جارامدى ستاديون دا جوق.

- بىزدە ينفراقۇرىلىم جولعا قويىلماعان. كەيبىر ايماقتاردا ۇلتتىق سپورت جارىستارىن وتكىزەتىن ستاديون دا جوق. ۇلتتىق سپورت رەسپۋبليكالىق اۋقىمدا دامۋ ءۇشىن ينفراقۇرىلىم ماسەلەسىن جۇيەلى تۇردە جولعا قويۋىمىز قاجەت دەپ ويلايمىن. ۇلتتىق سپورتقا دەگەن قولداۋدى زاڭنامالىق تۇرعىدا ءالى دە جەتىلدىرە ءتۇسۋىمىز كەرەك. جىلقى شارۋاشىلىعىن دامىتۋعا ارنالعان زاڭ قابىلداندى. وسىمەن توقتاپ قالماي، ۇلتتىق سپورت تۋرالى ارنايى زاڭ قابىلدانسا، سالانىڭ جوعارى كەڭىستىككە شىعۋىنا جول اشىلار ەدى، - دەيدى امانجول ءالتاي.

ۇلتتىق سپورتتا مامان تاپشىلىعى قاتتى سەزىلىپ جاتقانى دا ايتىلدى.

- مەن بىرنەشە مينيسترلىكتىڭ اتىن بۇل جەردە تەگىن اتاپ وتىرعان جوقپىن. بۇل سالادا ناقتى كادرلار دايىندالۋ كەرەك. بىزدە ۇلتتىق سپورت سالاسىنداعى كاسىبي ماماندار دايىندايتىن ورتا نەمەسە جوعارى ءبىلىم شاڭىراعى جوق. كاسىپتىك- تەحنيكالىق كوللەدجدەردە دە قاراپايىم عانا تاعاشى، باپكەر، شاباندوز سەكىلدى ماماندىقتار كاسىبي تۇرعىدا دايىندالۋى كەرەك، - دەدى دەپۋتات.

بۇعان دەيىن امانجول ءالتاي جاس اقىندار بالالارعا ارناپ ولەڭ جازبايتىنىن ايتقان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى