دەپۋتات ءاليا نازاربايەۆاعا قاتىستى كۇتپەگەن مالىمدەمە جاسادى
ءماجىلىس دەپۋتاتى ەرلان سايروۆ Amanat پارتياسىنىڭ جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق كەڭەستىڭ اتىراۋدا وتكەن كوشپەلى وتىرىسى بارىسىندا كۋاگەرلەر و ك م وپەراتورىنىڭ تۇپكى بەنەفيتسيارى ءاليا نازاربايەۆا دەپ كورسەتكەنىن ايتتى.
ول پارتيا جانىنداعى كەڭەستىڭ مۇشەلەرى رەسپۋبليكاعا بەلگىلى زاڭگەرلەر، مەملەكەت قايراتكەرلەرى مەن قوعام بەلسەندىلەرى جانە دەپۋتاتتار ەكەنىن العا تارتتى. ونىڭ ايتۋىنشا، جەمقورلىققا قارسى كەڭەس ءوز جۇمىسى بارىسىندا تەك وڭىرلەردەگى پروبلەمالارعا عانا ەمەس، ەلىمىزدە ازاماتتار كەڭ تالقىلاپ جۇرگەن ەڭ رەزونانس ماسەلەلەرگە باسا ءمان بەرەدى. وسى ورايدا كەڭەس ءتوراعاسى جينالعانداردىڭ نازارىن و ك م وپەراتورىنا قاتىستى ماسەلەگە اۋداردى.
«ادىلەتتى قازاقستاننىڭ كىرپىشى زاڭدى ورىنداۋداعى شىندىقتان قۇرالادى. بارلىعى زاڭ جانە زاڭدى قۇقىققا سايكەس بولۋى كەرەك. بارشامىزعا بەلگىلى جاقىندا روپ دەپ اتالاتىن ۇيىم باسشىلارىنىڭ ءبىرقاتارى قىلمىستىق جاۋاپقا تارتىلدى. سوت بارىسىندا كوپ كۋاگەر جەمقورلىققا قارجىنىڭ تۇپكى بەنەفيتسيارى ءاليا نازاربايەۆا دەپ كورسەتتى. ءبىراق سوت تا، باس پروكۋراتۋرا وكىلدەرى دە سوت پروتسەسىندە بۇل ازاماتتاردىڭ ۋاجىنە ەشقانداي نازار اۋدارمادى. ەگەر قازاقستاندا ادىلەتتى قوعام ورناتامىز دەسەك، ءاربىر ازامات ءوزىنىڭ كىناسىز ەكەنىن سوتقا كەلىپ دالەلدەۋى قاجەت»، - دەدى دەپۋتات.
سونداي-اق، ول ازاماتتاردىڭ ءۋاجىن مىندەتتى تۇردە باس پروكۋراتۋراعا جەتكىزەتىنىن جانە بۇل ماسەلە كەڭەستىڭ باقىلاۋىندا بولاتىنىن العا تارتتى.
ەسكە سالايىق، بۇعان دەيىن استانادا «و ك م وپەراتورىنىڭ» قىلمىستىق تالقىلاۋى بويىنشا الدىن الا تىڭدالىم باستالعانى، ال وندا ايىپتالۋشىلاردىڭ ادۆوكاتتارى وسى ءىس بويىنشا ءاليا نازاربايەۆادان جاۋاپ الۋدى سۇراعانى حابارلانعان ەدى.
Massaget.kz
