دەربەس دەرەكتەردى قورعاۋ كۇشەيتىلىپ، جەكە قۇجاتتاردىڭ قاعاز كوشىرمەلەرىن جيناۋعا تىيىم سالىنادى
بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپاراتتىق قاۋىپسىزدىك، اقپاراتتاندىرۋ جانە سيفرلىق اكتيۆتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ءبىرىنشى وقىلىمدا ماقۇلداندى، دەپ حابارلايدى Kazinform.
بۇل زاڭ اقپاراتتىق قاۋىپسىزدىك جانە دەربەس دەرەكتەردى قورعاۋ سالاسىنداعى زاڭنامانى ودان ءارى جەتىلدىرۋ، سونداي- اق سيفرلىق ماينينگ جونىندەگى قىزمەتتى رەتتەۋ ماقساتىندا ازىرلەندى. قۇجات اياسىندا اكىمشىلىك قۇقىق بۇزۋشىلىق تۋرالى، كاسىپكەرلىك، ەڭبەك جانە «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستەرگە، سونداي- اق قازاقستان رەسپۋبليكاسىنىڭ 10 زاڭىنا وزگەرىستەر مەن تولىقتىرۋلار ەنگىزۋ ەسكەرىلگەن.
«زاڭ دەربەس دەرەكتەردىڭ اينالىمى مەن ساقتالۋى سالاسىندا مەملەكەتتىك باقىلاۋدى كۇشەيتىپ، قۇقىقتىق بازاسىن قالىپتاستىرادى. سونداي- اق، زاڭدا وپەراتورلار دەربەس دەرەكتەر قاۋىپسىزدىگىنىڭ بۇزىلعانى تۋرالى ۋاكىلەتتى ورگانعا ءبىر جۇمىس كۇنىنەن كەشىكپەي حابارلاۋى مىندەتتەلگەن. ال، اقپاراتتىق جۇيەلەردىڭ وسال تۇستارى مەن كەمشىلىكتەرىن دەر كەزىندە انىقتاپ، ۇدايى جەتىلدىرۋ ماقساتىندا اقپاراتتىق جۇيەلەردى زەرتتەۋشى ۇزدىك مامانداردى تارتۋ دا زاڭعا ەنگىزىلىپ وتىر. بۇل - الەمدىك تاجىريبەدە بار شارا. سونىمەن قاتار، مەملەكەتتىك ورگانداردىڭ اقپاراتتىق قاۋىپسىزدىگىن قامتاماسىز ەتۋ ماقساتىندا ورتالىق قۇرىلىپ، «ەلەكتروندى ۇكىمەتتىڭ» ءبىرىڭعاي رەپوزيتورييى ناقتىلانىپ، وندا باعدارلامالىق ونىمدەردىڭ باستاپقى كودتارى ساقتالادى»، - دەدى سەناتور بيبيگۇل جەكسەنباي.
ونىڭ سوزىنە قاراعاندا، مەملەكەتتىك مۇددەنى قورعاۋ جانە ۇلتتىق قاۋىپسىزدىكتى قامتاماسىز ەتۋ ماقساتىندا شەتەلدەن كوشىپ كەلۋشىلەردەن جەكە باسىن كۋالاندىراتىن قۇجاتتاردىڭ كوشىرمەلەرىن تاپسىرۋ مىندەتتەلەدى.
دەربەس دەرەكتەردى قورعاۋ سالاسىنداعى ۋاكىلەتتى ورگانعا (سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى) مالىمەتتەر جانە ولاردى قورعاۋ تۋرالى زاڭنامانىڭ ساقتالۋىن قامتاماسىز ەتۋ ءۇشىن مەملەكەتتىك باقىلاۋدىڭ قوسىمشا فۋنكتسياسى بەرىلەدى.
«سيفرلىق ماينينگ جونىندەگى قىزمەتتى جەتىلدىرۋ باعىتىندا ليتسەنزيادان ايىرۋ، ونىڭ قولدانىسىن توقتاتا تۇرۋ جانە قايتا باستاۋ ءراسىمى بەلگىلەنىپ وتىر. زاڭنىڭ تۇجىرىمداماسى بويىنشا سەناتتىڭ تۇراقتى كوميتەتتەرىنىڭ ەسكەرتۋلەرى مەن ۇسىنىستارى بولعان جوق»، - دەدى ب. جەكسەنباي.
سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مالىمەتىنە قاراعاندا، قازاقستان رەسپۋبليكاسىنىڭ زاڭدارىندا تىكەلەي كوزدەلگەن جاعدايلاردى قوسپاعاندا، جەكە باسىن كۋالاندىراتىن قۇجاتتاردىڭ قاعاز كوشىرمەلەرىن جيناۋعا، وڭدەۋگە تىيىم سالۋ بەلگىلەنەدى.
اۆتور
رۋسلان عابباسوۆ
