دۇنيەجۇزىلىك كوشپەندىلەر ويىنىنا دايىندىقتىڭ لەبى دە سەزىلمەيدى - ءماجىلىس دەپۋتاتى

«2024 -جىلى V دۇنيەجۇزىلىك كوشپەندىلەر ويىنى استانا قالاسىندا وتەدى. بۇل - الەمدىك ەتنومادەني جانە ەتنوسپورتتى، ۇلتتىق ويىنداردى جاڭعىرتۋعا ارنالعان اسا ماڭىزدى الامان. ەڭ العاش 2014 -جىلعى قىرعىز ەلىندە وتكەن دودادا 19 ەلدەن 583 سپورتشى عانا باق سىناعان. كەيىن بۇعان دۇنيەءجۇزىنىڭ نازارى اۋدى. ارالىقتاعى 2، 3- ويىنداردىڭ ستاتيستيكاسىن تىزبەلەپ جاتپايىن. وتكەن جىلى تۇركيانىڭ يزنيك قالاسىندا وتكەن IV دۇنيەجۇزىلىك كوشپەندىلەر ويىنىنا لاتىن امەريكا ەلدەرىنەن باستاپ جاپونياعا دەيىنگى ارالىقتا الەمنىڭ 102 ەلىنەن 3500 سپورتشى باق سىنادى.

كوشپەندىلەر ويىندارىن وتكىزۋگە بەرگەن قازاقستاننىڭ ءوتىنىمى سول V دۇنيەجۇزىلىك الاماندا بۇكىلالەمدىك ەتنوسپورت كونفەدەراتسياسى جيىنىندا قولداۋ تاپقان.

«قولداۋ تاپتى» دەپ ايتۋعا عانا وڭاي. ءار ەل وزىنە قاراي تارتادى. كوزگە كورىنبەيتىن ينتريگالىق كۇرەستەردى، تالاسقان تاراپتاردى كوزبەن كورىپ، جۇرەكپەن سەزىنگەنبىز. سوندا دۇنيەجۇزىلىك كوشپەندىلەر ويىنىنىڭ قازاقستاندا وتۋىنە مەملەكەت باسشىسىنىڭ ساياسي بەدەلى مەن ەرىك- جىگەرى تىكەلەي كوپىر بولدى. پرەزيدەنت قاسىم- جومارت توقايەۆ ەلىمىزدە وتەتىن اۋقىمدى شارانى ساپالى ءارى جوعارى دەڭگەيدە ۇيىمداستىرۋ جونىندە ناقتى تاپسىرما بەردى»، - دەدى ءماجىلىس دەپۋتاتى.

اتاپ وتۋىنشە، سودان بەرى ءبىر جىل ۋاقىت ءوتتى. الايدا، دۇنيەجۇزىلىك دودانى ۇيىمداستىرۋ جۇمىستارىنىڭ لەبى سەزىلمەيدى.

«مالىمەت بويىنشا، ۇكىمەتتىك دەڭگەيدە كوميسسيا قۇرىلعان. باستى سايىستار وتەتىن نىسان رەتىندە استانا قالاسىنداعى «استانا- ارەنا»، «قازانات» يپپودرومى، «جەكپە- جەك» سارايى جانە «الاۋ» مۇز سارايى بەكىتىلگەن. 8 ميلليارد تەڭگە قاراستىرىلعان، ءبىراق بۇل ينفراقۇرىلىمدارعا ەمەس، ۇيىمداستىرۋ جۇمىستارىنا.

جالپى، سپورت پەن تۋريزم سالاسىندا تۇرالاپ تۇرعان ماسەلە كوپ. سول ءۇشىن دە مەملەكەت باسشىسى سالاعا قاتىستى پروبلەمالاردى شەشۋ ءۇشىن تۋريزم جانە سپورت مينيسترلىگىن قۇردى. ەندى سول جاڭا ۆەدومستۆونىڭ سىنالاتىن شاعى. بۇعان دەيىن وتكىزۋگە جاۋاپتى مەملەكەتتىك ورگان ءتيىستى پروتسەدۋرالاردى ءوز دەڭگەيىندە ۇيىمداستىرا الماي جاتىر. ءتيىستى مەملەكەتتىك ورگاننىڭ سالعىرتتىعى سالدارىنان قالالىق اكىمشىلىككە ينفراقۇرىلىمدى رەتتەۋگە ءبىر تيىن قارجى بولىنبەگەن. ال استانا قالاسى اكىمدىگى ۇكىمەت جاققا جالتاقتاۋمەن دارمەنسىزدىڭ كۇيىن كەشۋدە»، - دەدى جاناربەك ءاشىمجان.

دەپۋتات دۇنيەجۇزىلىك دودا 2024 -جىلدىڭ قىركۇيەگىندە وتەتىندىگىن ەسكە سالدى.

«تۋرا 11 اي قالدى. الدا قىلىشىن سۇيرەتىپ قىس كەلەدى. اقتۇتەك بوران، سارشۇناق ايازبەن الىسىپ تاعى 6 اي وتەدى. نەگىزگى شارالار وتەتىن «قازانات» يپپودرومىندا 10 مىڭ ادامعا قىزمەت ەتەتىن نىسان قۇرىلىسى ءجۇرىپ جاتۋ كەرەك ەدى. وزگە دە سپورتتىق نىسانداردىڭ كۇردەلى جوندەۋ جۇمىستارى، رەكونسترۋكسيا، باسقا دا جۇمىستارى توقتاپ تۇر. جانە اتشابارعا جاپسارلاس ەتنواۋىل جوسپارلانعان. كۇنى كەشە اياقتاي بارىپ كوردىك. ءولى تىنىشتىق. قازىردىڭ وزىندە كوشپەندىلەر ويىنىنا قاتىسۋعا 20 سپورت ءتۇرى بويىنشا 73 ەل ءوتىنىش بەرگەن. دەمەك، 100-دەن اسا ەلدەن 3000 اسا سپورتشى قاتىسادى دەپ جوسپارلانۋدا»، - دەدى ول.

جاناربەك ءاشىمجان سپورتتىق جارىستاردى تاراتاتىن ترانسليتسيا تاقىرىبى ءالى جابىق كۇيىندە ەكەندىگىن دە باسا ايتتى.

«وتكەن جىلعى دۇنيەجۇزىلىك كوشپەندىلەر ويىنىن الەمنىڭ 70-كە جۋىق مەملەكەتى تاماشالاعان. اقپارات تاراتۋعا شەتەلدىك ب ا ق- تىڭ 800-دەن اسا وكىلى كەلگەن. ولاردىڭ اراسىندا 57 تەلەارنا، 16 راديوستانسيا، 87 اقپاراتتىق اگەنتتىك پەن 48 باسىلىم وكىلى جانە 70-تەن اسا تانىمال بلوگەر بولعان. قىسقاسى، شارۋا شاش- ەتەكتەن. ۇلتتىق سپورتتى دامىتۋدا «امانات» پارتياسى بىرنەشە باعىتتا جۇيەلى جۇمىستار ىستەۋدە. «ۇلى دالا جورىعى» - وسىنىڭ ايقىن دالەلى!»، - دەدى ءماجىلىس دەپۋتاتى.

وسىعان وراي جاناربەك ءاشىمجان ۇكىمەت باسشىسىنا مىناداي ۇسىنىستارىن جەتكىزدى:

ۇكىمەتتىك كوميسسيا ۇيىمداستىرۋ جۇمىستارىن جەدەلدەتۋ كەرەك.

استانا قالاسى اكىمدىگىمەن بىرلەسە وتىرىپ سپورتتىق ينفراقۇرىلىمداردىڭ قۇرىلىسى مەن رەكونسترۋتسياسىنا قاتىستى قارجى پروتسەدۋرالارىن ۇيىمداستىرۋ قاجەت.

كوشپەندىلەر ويىنىن وتكىزۋ تەك استانا قالاسىنىڭ عانا ەمەس، بۇكىل ەلدىڭ جاۋاپكەرشىلىگى. سوندىقتان ۇيىمداستىرۋ جۇمىستارىنا وڭىرلەردى جۇمىلدىرىپ، «ءبىر ءوڭىر - ءبىر نىسان» پرينتسيپىنە كۇش سالۋ كەرەك.

دۇنيەجۇزىلىك كوشپەندىلەر ويىنىندا قازاق ەلىنىڭ تۋريزم الەۋەتىن تابىستى پايدالانۋ باعىتىندا ناقتى جوبالار ازىرلەۋ كەرەك.

ۇلتتىق سپورتتى جانە سپورتشىلاردى ناسيحاتتايتىن ءتۇرلى فورماتتاعى اقپاراتتىق ۇگىت جۇمىستارىن قولعا الۋ كەرەك.

ويىندى وتكىزۋشى ەل رەتىندە ناقتى رەگلامەنتتەردى بەكىتكەندە قازاقتىڭ ۇلتتىق ويىندارى مەن ءتۇرلى ۇستالىق ونەرگە باسىمدىق بەرۋ كەرەك.

ەلىمىزدەگى ەڭ ءىرى مەگاجوباعا اينالعان «ۇلى دالا جورىعىن» دۇنيەجۇزىلىك كوشپەندىلەر ويىنىنىڭ رەگلامەنتىنە ەنگىزۋ كەرەك.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى