دەلدال ساتقان بيلەتپەن دجەي لو كونسەرتىنە كىرە المايسىز - تەكسەرۋ جۇمىستارى باستالدى

- استاناداعى دجەننيفەر لوپەس كونسەرتى رەكوردتى قىزىعۋشىلىق تۋدىردى، بيلەتتەر ساناۋلى ساعاتتا ساتىلىپ كەتتى. ەندى پلاتفورما كومانداسى فەيك اككاۋنتتار ارقىلى جاپپاي ساتىپ الىنعان بيلەتتەرگە تەكسەرۋ جۇرگىزىپ جاتىر. الىپساتارلار OLX جەلىسىندە ۆاۋچەردى ەسەلەنگەن باعاعا ساتۋدى باستاپ كەتتى، - دەپ جازدى مالىك حاسەنوۆ Instagram جەلىسىندە.

پروديۋسەردىڭ ايتۋىنشا، بۇل كەزەڭدە كورەرمەندەر كونسەرت بيلەتىن ەمەس، ۆاۋچەردى عانا ساتىپ الادى. بۇل ۆاۋچەرلەر كونسەرت ۋاقىتى جاقىنداعاندا دا كۇشىنە ەنەدى.

- تانىمايتىن ادامداردان ۆاۋچەر ساتىپ العاندار كونتسەرتكە كىرە الماي قالۋى مۇمكىن، سەبەبى ناعىز بيلەت ساتىپ العاندا كورسەتىلگەن ەلەكتروندى پوشتاعا كەلىپ تۇسەدى، - دەپ ءتۇسىندىردى م. حاسەنوۆ.

قازىر كونسەرت بيلەتىن ساتاتىن تيكەتون. ك ز كومانداسى كۇماندى ساۋدالاردى انىقتاپ، كۇشىن جويۋمەن اينالىسىپ جاتىر. بارلىق تەحنيكالىق تەكسەرۋ جۇمىستارى اياقتالعان سوڭ، بوساعان ورىندار رەسمي ساتىلىمعا شىعادى.

بۇعان دەيىن 1-تامىزدا «استانا ارەنا» ستاديونىندا الەمگە ايگىلى ءانشى دجەننيفەر لوپەستىڭ كونسەرتى وتەتىندىگىن جازعان ەدىك. بيلەتتەر كەشە ساعات 11:00 دە ساتىلىمعا شىقتى.

ەلورداداعى كونسەرت الەمدىك جۇلدىزدىڭ Up All Night تۋرنەسى اياسىندا وتپەك. الەمدىك تۋر 1-شىلدەدە باستالىپ، 3-تامىزعا دەيىن جالعاسادى. ول الەمنىڭ 17 قالاسىن قامتيدى، سونىڭ ىشىندە: انتاليا مەن ىستانبۇل، مادريد پەن بارسەلونا، بۋداپەشت، ۆارشاۆا، بۋحارەست، ءابۋ-دابي قالالارى بار.

دجەننيفەر لوپەستىڭ كەلۋى - استانانىڭ ا- كلاسستى جۇلدىزداردىڭ گاسترولدىك كارتاسىنا ەنۋىنە جول اشادى. بۇل كونسەرتكە 15 مىڭنان استام شەتەلدىك تۋريست كەلەدى، قالا ەكونوميكاسىنا 6,5 ميلليرد تەڭگە جانە كونسەرت وتكىزۋدەن 400 ميلليون تەڭگەدەن استام تىكەلەي سالىق تۇسەدى دەگەن بولجام بار.

بۇعان دەيىن حابارلانعانداي، الەۋمەتتىك جەلىدە دجەي لونىڭ كونسەرتىنە قازاقستانعا تۋرلار ساتىلىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى