دجو بايدەن 81 جاسقا تولدى
امەريكا پرەزيدەنتى دجو بايدەن 81 جاسقا تولعان تۋعان كۇنىن اق ءۇيدىڭ داستۇرىنە ساي اتاپ وتۋدە - بۇگىن العىس ايتۋ كۇنى قۇرمەتىنە كۇركەتاۋىقتارعا راقىمشىلىق جاسالدى.
kazinform بۇل تۋرالى Associated Press-كە سىلتەمە جاساپ حابارلايدى.
دۇيسەنبى كۇنى العىس ايتۋ كۇنىنە وراي ەكى كۇركەتاۋىق اق ۇيگە جەتكىزىلدى. وندا د. بايدەن قۇستاردى بۇل مەرەكەدە الدەكىمنىڭ كەشكى اسىنا اينالۋ تاعدىرىنان «قۇتقاردى».
بۇل ءداستۇر ەلدە 1974-جىلى باستاۋ العان. ول كەزدە ۇلتتىق كۇركەتاۋىق فەدەراتسياسى ا ق ش پرەزيدەنتى گارري ترۋمەنگە العىس ايتۋ كۇنىنە وراي العاش رەت كۇركەتاۋىقتى سىيعا تارتتى.
كۇركەتاۋىق بۇل مەرەكەدە وتباسىلىق كەشكى استىڭ باستى تاعامى سانالىپ كەلدى. الايدا 1980-جىلدىڭ سوڭىنا قاراي بۇل ءداستۇر ءازىلدى راسىمگە اينالدى. ونىڭ بارىسىندا كۇركەتاۋىققا العىس ايتۋ كۇنى قۇرمەتىنە «كەشىرىم» بەرىلىپ، ءومىر سۇرۋگە ەكىنشى مۇمكىندىك بەرىلەدى.
دجو بايدەن – ا ق ش تاريحىنداعى ەڭ كارى پرەزيدەنت. ول بۇگىن 81 جاسقا تولعان تۋعان كۇنىن اتاپ وتۋدە. 2021-جىلدىڭ 20- قاڭتارىنان امەريكانىڭ ءىس باسىنداعى پرەزيدەنتى.
36 جىل بويى ا ق ش سەناتىندا دەلاۆەر شتاتىنان وكىل بولدى. ودان كەيىن - 2009-2017-جىلدار ارالىعىندا (باراك وباما اكىمشىلىگىندە) 47-ۆيتسە-پرەزيدەنت قىزمەتىن اتقاردى.
