دجەننيفەر لوپەستىڭ كونسەرتىنە قايتالانىپ ساتىلعان بيلەتتەردىڭ قۇنى وتەلەدى

Ticketon.kz سايتىندا بيلەت ساتۋ كەزىندە بولعان تەحنيكالىق اقاۋدىڭ سەبەبىن سەرۆيس نەگىزىن قالاۋشى الەكسەي لي Threads پاراقشاسىندا ءتۇسىندىردى. ول پايدالانۋشىلاردان كەشىرىم سۇراپ، تۋىنداعان قولايسىزدىقتار ءۇشىن وتەماقى بەرۋگە ۋادە ەتتى.

الەكسەي ليدىڭ ايتۋىنشا، سەرۆەردىڭ قۋاتتىلىعىن ءۇش ەسە ارتتىرۋعا قاراماستان، سايت جۇكتەمەگە شىداس بەرمەگەن، اقىرىندا بيلەتتەردى ساتۋ توقتاتىلدى.

- ءبىز الدىن الا @ticketonkz ينفراقۇرىلىمىن كۇشەيتىپ، سەرۆەرلەردى ءۇش ەسە ارتتىردىق. بۇل رەتتە الدىڭعى ەڭ جوعارى سۇرانىس دەڭگەيىنە سۇيەندىك (بۇعان دەيىنگى رەكورد - كورجدىڭ كونتسەرتىنە شامامەن 13500 بيلەت 1,5 ساعات ىشىندە ساتىلىپ كەتكەن بولاتىن). الايدا قىزىعۋشىلىقتىڭ شىنايى اۋقىمىن ەسەپتەي المادىق. سايت ىستەن شىققان كەزدە، تەحنيكالىق توپ Cloudflare كومپانياسىنىڭ جۇكتەمە ينفراقۇرىلىمىنا ارنالعان ەلەكتروندى كەزەك جۇيەسىن شۇعىل ەنگىزدى. ءبىراق اسىعىس جاعدايدا كەيبىر ماڭىزدى جايتتار ەسكەرۋسىز قالىپ، ناتيجەسىندە كوپتەگەن تاپسىرىس بروندالىپ، بيلەتتەردىڭ قايتالانۋى قاۋپى تۋىندادى. ءبىز بۇل ءقاۋىپتى بايقاعان سوڭ، ساتۋدى توقتاتىپ، ءتۇنى بويى قولمەن دۋبليكاتتاردى انىقتاپ، الىپساتارلاردى انىقتاپ، ءار كليەنتكە جەكە شەشىم ىزدەۋمەن اينالىستىق، - دەپ جازدى ول Threads پاراقشاسىندا.

تۇنگە قاراي كومپانيا دۇرىس راسىمدەلگەن ساتىپ الۋلار بويىنشا ۆاۋچەرلەردى جىبەرۋدى باستادى. قازىر سەرۆەردىڭ تەحنيكالىق قىزمەتى تاۋلىك بويى جۇمىس ىستەپ جاتىر.

- قولىندا ۆاۋچەرى بار كليەنتتەر ۋايىمداماسا بولادى. بۇگىن ءبىز بارلىق تەكسەرىستى اياقتاپ، قالعان كليەنتتەرگە ۆاۋچەرلەردى جىبەرۋدى باستايمىز، - دەدى الەكسەي لي.

كومپانيا جاعدايدى ادىلەتتى تۇردە شەشۋ ءۇشىن مىناداي قادامدار جاساپ جاتىر:

بىرىنشىدەن، بارلىق ساتىپ الۋشىعا بيلەت ساناتىنا قاراماستان Ticketon كوميسسياسىن تولىق قايتارادى؛

ەكىنشىدەن، تاپسىرىسى باسقا كورەرمەندەردىڭ تاپسىرىسىمەن قايتالانۋى مۇمكىن بولعان كليەنتتەرمەن جەكە جۇمىس جۇرگىزىلىپ جاتىر. ەكى ستسەناريي بويىنشا ارەكەت ەتىپ جاتىر.

كوپشىلىگىنە اپگرەيد جاسايدى: بيلەتتەردىڭ ساناتىن جوعارى دەڭگەيگە اۋىستىرادى. از بولىگىنە، ەگەر بيلەت ساناتى تومەندەتىلسە، بيلەت قۇنىن تولىق قايتارادى جانە ولار كونسەرتكە تەگىن بارا الادى (جۇزدەگەن ادام).

سونىمەن قاتار الەكسەي لي بىلتىر Ticketon سەرۆيسىنىڭ جاڭا نۇسقاسىن جاساپ باستاعاندارىن ايتىپ ءوتتى. باستاپقىدا ونى كۇزدە ىسكە قوسۋدى جوسپارلاعان، الايدا سوڭعى جاعدايعا بايلانىستى جاڭا جۇيەنى جاقىندا ىسكە قوسۋ جوسپارلانىپ وتىر.

- مەن بارشادان كەشىرىم سۇرايمىن. مۇنداي تاجىريبەنى كىتاپتان وقىپ ۇيرەنۋ مۇمكىن ەمەس، مۇنداي جاعداي قازاقستانداعى بىردە-ءبىر بيلەت ساتۋ سەرۆيسىنىڭ باسىنان وتپەگەن. ءبىز بۇل قاتەلىكتەن ساباق الىپ، مىقتى بولا تۇسەمىز. قازاقستاندا الەمدىك دەڭگەيدەگى وتاندىق سەرۆيس بولادى. بارشاڭىزعا شىدامدىلىق پەن قولداۋ ءۇشىن راقمەت، - دەپ جازدى الەكسەي لي.

ايتا كەتەيىك، بيىل 1-تامىزدا الەمگە تانىمال پوپ-جۇلدىز دجەننيفەر لوپەس استانادا كونسەرت بەرەدى.

كەيىن الەۋمەتتىك جەلىدە دجەي لونىڭ كونسەرتىنە قازاقستانعا تۋرلار ساتىلىپ جاتقانى ايتىلدى.

ارتىنشا ۇيىمداستىرۋشىلار دەلدال ساتقان بيلەتپەن دجەي لو كونسەرتىنە كىرە المايتىنىن جانە زاڭسىز ساتۋعا قاتىستى تەكسەرۋ جۇمىستارى باستالعانىن مالىمدەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى