دۋبايداعى كورمە: ەكولوگيا ۆيتسە-ءمينيسترى كۋاگەر رەتىندە جاۋاپ بەردى
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ دۋبايداعى كورمەدەن كەيىن ۆەدومستۆوداعى قىزمەتكەرگە قاتىستى تەرگەۋ امالدارى بويىنشا پىكىر ءبىلدىردى.
بۇگىن سەناتتا ورنىقتى دامۋ سالاسىنا قاتىستى وتىرىستان كەيىن تىلشىلەر مينيستردەن تەرگەۋ امالدارى اياسىندا ۆيتسە-مينيستر مانسۇر وشۋربايەۆتىڭ ستاتۋسىنا قاتىستى سۇرادى.
«دۋبايداعى قازاقستان پاۆيلونىنىڭ دايىندالۋىن تەكسەرۋ اياسىندا ونىڭ كابينەتىندەگى قۇجاتتار الىندى. قازىر ودان كۋاگەر رەتىندە جاۋاپ الىنىپ جاتىر»، - دەدى ە. نىسانبايەۆ.
ونىڭ ايتۋىنشا، ۆيتسە-مينيسترگە ايىپ تاعىلماعان.
«قازىر ول جۇمىسىن جالعاستىرىپ جاتىر. تەرگەۋ قورىتىندىسى بويىنشا شارا قابىلدانادى. ول كۋاگەر رەتىندە جاۋاپ بەرىپ، تەرگەۋ امالدارىنا اتسالىسىپ جاتىر»، - دەدى ەكولوگيا ءمينيسترى.
ەسكە سالساق، بيىل اقپان ايىنىڭ باسىندا سىبايلاس جەمقورلىققا قارسى قىزمەت ەكولوگيا جانە تابيعي رەسۋرستار مينيسترلىگىنىڭ قىزمەتكەرلەرىنە قاتىستى تەرگەۋ ءجۇرىپ جاتقانىن راستادى.
بۇعان دەيىن ەكولوگيا مينيسترلىگىنىڭ دۋبايدا وتكەن كورمەگە قاتىسۋى كەزىندە ءبىرقاتار زاڭبۇزۋشىلىق انىقتالىپ، لاۋازىمدى تۇلعالار ۇستالعانى جايلى ينسايدەرلىك حابار تاراعان ەدى.
ەكولوگيا جانە تابيعي رەسۋرستار مينيسترلىگىنەن حابارلاعانداي، ۆەدومستۆو ب ۇ ۇ كليماتتىڭ وزگەرۋى جونىندەگى نەگىزدەمەلىك كونۆەنسياسى تاراپتارىنىڭ 28-كونفەرەنسياسىن وتكىزۋگە جۇمسالعان شىعىنعا قاتىستى ىشكى اۋديت جۇرگىزگەن.
