دۋبايدا قازاقتاردىڭ العاشقى قۇرىلتايى ءوتتى
جىل باسىنان بەرى دۋبايدا 50 دەن استام قازاقستاندىق كومپانيا رەسمي تىركەلىپ، كاسىبىن جۇرگىزىپ وتىر. جالپى وتاندىق تاۋار مەن قىزمەت تۇرلەرىن امىرلىكتەر ارقىلى 2 ميلليارد تۇتىنۋشىعا جەتكىزۋگە مۇمكىندىك بار.
وسىلايشا افريكا، تاياۋ شىعىس، ءتىپتى وڭتۇستىك ازيا ەلدەرىن دە قامتۋعا بولادى. بۇل تۋرالى دۋبايدا تۇراتىن وتانداستارىمىزدىڭ العاشقى قۇرىلتايىندا ايتىلدى. بۇل دۋبايداعى قازاقتاردىڭ العاشقى قۇرىلتايى.
راۋان جۇمابەك، قازاقستاننىڭ دۋبايداعى باس كونسۋلى:
"قازاق حالقى الەمنىڭ قاي تۇكپىرىندە بولسا دا ەل بىرلىگىن نىعايتۋدى ۇمىتپاعان. سوندىقتان سىرتتا تۇراتىن قازاقتار ءبىر ءبىرىن تانىپ ءوزارا قولداۋ كورسەتىپ وتىرعانى وتە ماڭىزدى".
سوڭعى 6 جىلدا دۋبايدا تىركەلگەن قازاقستاندىق كومپانيالاردىڭ سانى 351 دەن 637 گە جەتتى. ياعني بيىل جاڭادان 54 كومپانيا اشىلعان. وتاندىق كاسىپكەرلەر ۇلتتىق تاۋارلارىمىزدى اراب نارىعىنا ساۋدالاپ وتىر.
عالىمجان مەيرامبەكوۆ، كاسىپكەر:
"قازاقستاننان ساۋمالدى اكەلىپ، قۇرعاتىلعان ساۋمالدى وسى اراب ەلدەرىندە ساتامىز، ارابتارعا وتە جاقسى ۇنايدى. ويتكەنى وزدەرىنىڭ دە جىلقىلارى بار جانە ولار تۇسىنەدى نە ەكەنىن. ءبىراق ولاردىڭ «پسيحولوگيچەسكي بارەر» دەگەن بار، مىناۋ جىلقى ءسۇتىن ەشقاشان كورمەگەن، ءيىسىن، ءدامىن تاتپاعان. ءبىراق ەپتەپ سونى ەنگىزىپ جاتىرمىز".
جيىنعا اراب كاسىپكەرلەرى دە كەلىپ، قازاقتاردىڭ قۋانىشىنا ورتاقتاستى. ولار ءتول ونەرىمىزدى تاماشالاپ، ۇلتتىق ويىندارعا بەلسەنە قاتىستى.
مۇحاممەد بۋ دجاسيم، جەرگىلىكتى كاسىپكەر:
"باستى سەرىكتەس ەل قازاقستاننىڭ ۇلتتىق مەرەكەسى قۇتتى بولسىن! قازاق حالقى ۇيىمشىل، باۋىرمال ەكەندىگىنە بۇگىن كوزىمىز جەتتى. قازىر ءوزارا يمپورت تا، ەكسپورت تا ۇلعايعان. ءبىزدىڭ كومپانيا 34 جىلدان بەرى زاڭگەرلىك قىزمەتتەر ۇسىنىپ كەلەدى. قازاق ازاماتتارىمەن، كاسىپكەرلەرىمەن تىعىز بايلانىستا جۇمىس ىستەيمىز".
بيبىگۇل نىسانبايەۆا، ءتىلشى:
- قازىر بەيرەسمي اقپارات بويىنشا دۋباي امىرلىگىندە 10 مىڭنان اسا قازاقستاندىق ءومىر سۇرەدى. بۇدان باسقا، وسىندا ەلىمىزدەن دەمالۋ ءۇشىن كۇندە قانشاما تۋريست كەلىپ جاتىر. اپتاسىنا 60 تان استام اۋە رەيسى قاتىنايدى. وسىنىڭ ءوزى ەكى ەلدىڭ اراسىندا سەنىمدى ءارى تىعىز بايلانىستىڭ بەرىك ورناعانىن كورسەتسە كەرەك.
بيبىگۇل عادىلبەك قىزى، ەرالى تىلەۋىش
