«دۋباي شوكولادىن» ساتامىن دەپ جۇرتتى الداعان استانالىق 3 جىلعا سوتتالىپ كەتتى
استانا. KAZINFORM - استانا قالاسىنىڭ قىلمىستىق ىستەر جونىندەگى اۋدانارالىق سوتى بىرنەشە رەت الاياقتىق جاسادى دەپ ايىپتالعان ا. -عا قاتىستى ۇكىم شىعاردى.
ا. ەسىمدى ازامات استانا قالاسىندا «دۋباي شوكولادىن» جەتكىزۋ جانە ساتۋ تۋرالى «OLX» سايتىندا حابارلاندىرۋ جاريالاپ، ءبىراق مۇنداي مۇمكىندىككە يە بولماسا دا WhatsApp قوسىمشاسى ارقىلى ءوزىنىڭ بانكتىك شوتىنا اقشا اۋدارۋدى سۇراپ، اقشا قاراجاتى تۇسكەننەن كەيىن جابىرلەنۋشىلەردىڭ تەلەفون نومىرلەرىن بۇعاتتاپ، 9 جابىرلەنۋشىگە جالپى سوماسى 176300 تەڭگە زالال كەلتىرگەن.
سوتتالۋشىنىڭ كىناسى ونىڭ مويىنداۋىمەن جانە قىلمىستىق ءىس ماتەريالدارىمەن دالەلدەنگەن. وعان ق ك 190-بابى 3-بولىگىنىڭ 4) تارماعى بويىنشا ايىپ تاعىلدى. پروكۋرور 3 جىل 6 ايعا باس بوستاندىعىن شەكتەۋدى سۇرادى. قورعاۋشى تاراپ پەن جابىرلەنۋشىلەر پروكۋروردىڭ ۇستانىمىمەن كەلىستى.
- ق ك 190-بابى 3-بولىگىنىڭ سانكسياسى 3 جىلدان 7 جىلعا دەيىنگى مەرزىمگە باس بوستاندىعىن شەكتەۋ نەمەسە باس بوستاندىعىنان ايىرۋ تۇرىندەگى جازانى كوزدەيدى. سوتتالۋشىنىڭ قىلمىستىق جاۋاپتىلىعى مەن جازاسىن جەڭىلدەتەتىن ءمان-جايلار رەتىندە سوت ونىڭ كىناسىن مويىنداۋىن، شىن جۇرەكتەن وكىنۋىن، قىلمىستىق قۇقىق بۇزۋشىلىق ناتيجەسىندە كەلتىرىلگەن مۇلىكتىك زياندى ەرىكتى تۇردە وتەۋىن جانە جاس بالالارىنىڭ بولۋىن تانىدى. اۋىرلاتاتىن ءمان- جايلار بولمادى، - دەلىنگەن حابارلامادا.
ءىس سوتقا دەيىنگى جەدەل تەرگەپ- تەكسەرۋمەن اياقتالدى جانە جازا تاعايىنداۋ بارىسىندا باپتىڭ سانكتسياسىندا كوزدەلگەن جازانىڭ جارتىسىنان اسپاۋعا ءتيىس.
- سوت سوتتالۋشىنى باس بوستاندىعىنان ايىرماۋدى سۇراعان جابىرلەنۋشىلەردىڭ ۇستانىمىن ەسكەرە وتىرىپ، وعان 3 جىل 3 اي مەرزىمگە باس بوستاندىعىن شەكتەۋ تۇرىندەگى جازا تاعايىندادى. ۇكىم زاڭدى كۇشىنە ەنگەن جوق، - دەپ اتاپ ءوتتى قالالىق قىلمىستىق ىستەر جونىندەگى اۋدانارالىق سوت.
قازىر دۋباي شوكولادى، شاين مۋسكات ءجۇزىمى ترەندتەگى تاعامعا اينالدى. ەلىمىزگە بەلگىلى ادامدار عانا ەمەس، قاراپايىم تۇرعىندار دا يمپورت ءونىمنىڭ قورابىن اشىپ، اۋزىنا سالعان ساتىنە دەيىن ۆيدەوعا ءتۇسىرىپ، جاريالاپ قويادى.
