دارىگەردى ۇرىپ، ءمايىتتى ۇرلادى: كۇدىكتىلەر 12 جىلعا قامالۋى مۇمكىن
الماتى وبلىسىنىڭ پوليتسياسى تالعار قالاسىندا مەديتسينا قىزمەتكەرلەرىن ۇرىپ- سوققان كۇدىكتى ەكى ادامدى ۋاقىتشا ۇستاۋ يزولياتورىنا قامادى، دەپ حابارلايدى قازاقپارات ءتىلشىسى.
الماتى وبلىستىق پوليتسيا دەپارتامەنتى باسپا ءسوز قىزمەتىنىڭ باسشىسى ەرنار سايديلدين قىلمىستىق ءىس قوزعالعانىن اتاپ ءوتتى.
«ق ر قىلمىستىق كودەكسىنىڭ 106-بابى 2-بولىگىنە سايكەس دەنساۋلىققا قاساقانا اۋىر زيان كەلتىرگەنى ءۇشىن مۇلكى تاركىلەنىپ نەمەسە 8 جىلدان 12 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان. قىلمىستىق ءىس وبلىستىق پوليتسيا دەپارتامەنتى باسشىلىعىنىڭ باقىلاۋىندا. ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى»، - دەدى الماتى وبلىسى پ د باسپا ءسوز قىزمەتىنىڭ باسشىسى ەرنار سايديلدين.
ەسكە سالايىق، كەشە تالعار اۋداندىق اۋرۋحاناسىندا اكەسىنىڭ قايتىس بولعانىن ەستىگەن ۇلدارى مەديتسينا قىزمەتكەرلەرىنە كۇش كورسەتىپ، مارقۇمنىڭ دەنەسىن ۇرلاپ كەتكەن.
كەيىن دەنساۋلىق ساقتاۋ مينيسترلىگى اتالعان وقيعاعا قاتىستى پىكىر ءبىلدىرىپ، دارىگەرلەردى سوققىعا جىققانداردى جازالاۋدى تالاپ ەتتى.
كوپ ۇزاماي ەكى كۇدىكتى ۇستالىپ، پوليتسيا بولىمىنە جەتكىزىلگەنى ءمالىم بولدى.
