دارىگەر، نوتاريۋس، دونور: ادام اعزالارىن ساتۋمەن اينالىسقان 22 ادام ۇستالدى
الماتى وبلىسىنىڭ پوليتسيا دەپارتامەنتى پروكۋراتۋرانىڭ ۇيلەستىرۋىمەن ادام اعزالارىن الىپ- ساتۋمەن اينالىسىپ كەلگەن قىلمىستىق توپتى قۇرىقتادى، دەپ حابارلايدى Kazinform.
Polisia.kz مالىمەتىنشە، الماتى قالاسى، الماتى، جامبىل جانە تۇركىستان وبلىستارىنداعى ۇيىمداسقان قىلمىسقا قارسى كۇرەس قىزمەتكەرلەرى 22 فيگۋرانتتى ۇستاعان. ولاردىڭ اراسىندا ۇيىمداستىرۋشىلار، مەديتسينا قىزمەتكەرلەرى، نوتاريۋس، رەتسيپيەنتتەر مەن دونورلار بار.
كۇدىكتىلەر رەتسيپيەنتتەر مەن دونورلاردى ىزدەۋ، جالعان قۇجاتتاردى رەسىمدەۋ جانە ىشكى ورگانداردىڭ ترانسپلانتاتسياسى بويىنشا وپەراتسيالاردى ۇيىمداستىرۋ مىندەتتەرىن ءوزارا ءبولىسىپ، ارەكەت ەتكەن.
اعزاعا مۇقتاج ادامدارمەن كەلىسىم سوماسى 6-10 ميلليون تەڭگەنى قۇراعان. وسىنداي فاكتىلەردىڭ 8 دەرەگى انىقتالعان.
«ءۇش نەگىزگى ۇيىمداستىرۋشى قاماۋعا الىندى. ىزدەستىرۋ ءىس-شارالارىنىڭ ناتيجەلەرى بويىنشا كۇدىكتىلەردەن اقشا، قۇجاتتاما، تسيفرلىق تاسىمالداعىشتار جانە باسقا دا زاتتاي دالەلدەمەلەر تاركىلەندى.
«حالىق دەنساۋلىعى جانە دەنساۋلىق ساقتاۋ جۇيەسى تۋرالى» قازاقستان رەسپۋبليكاسىنىڭ كودەكسىنە سايكەس ترانسپلانتاتسيالاۋ كەزىندە ادام اعزالارى مەن تىندەرىن الىپ-ساتۋعا تىيىم سالىنادى.
ق ر ق ك-نىڭ 116-بابى بويىنشا («ادامنىڭ اعزالارى مەن تىندەرىن الىپ قويۋعا ماجبۇرلەۋ نەمەسە زاڭسىز الىپ قويۋ» ) سوتقا دەيىنگى تەرگەپ-تەكسەرۋ جۇرگىزىلىپ جاتىر. باپتىڭ سانكتسياسى مۇلكى تاركىلەنىپ، 12 -جىلعا دەيىن باس بوستاندىعىنان ايىرۋ تۇرىندەگى جازانى كوزدەيدى.
قىلمىستىق- پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى»، - دەلىنگەن پوليتسيا مالىمەتىندە.
