دارىگەر ءوت قىزمەتىن ءدارىسىز جاقسارتۋدىڭ جولدارىن ايتتى
ءوت قابىنىڭ ساپالى قىزمەتى ءومىرىڭىزدى ۇزارتادى.
ينتەگراتيۆتى مەديتسينا دارىگەرى رۋسلان ماسگۋتوۆ «دوكتور پيتەر» پورتالىنا بۇل ماڭىزدى ورگاننىڭ جۇمىسىن قالاي جاقسارتۋعا بولاتىنىن ايتتى، - دەپ حابارلايدى Massaget.kz ءتىلشىسى.
ءوت شىعۋىنىڭ بۇزىلۋى ءقاۋىپتى اۋرۋلارعا، مىسالى، ءبىرىنشى ءتيپتى ديابەت، اسقازان جانە اش ىشەك جاراسى جانە ءتىپتى، پانيكالىق شابۋىلعا اكەلۋى مۇمكىن. قاۋىپ توبىنا كوپتەگەن ادامدار كىرەدى. سەبەبى زاماناۋي ءومىر سالتى جانە باسقا دا سىرتقى فاكتورلار ءوت قابىنىڭ جۇمىسىن ناشارلاتادى.
وتىڭىزبەن پروبلەما بار ەكەنىن ءوزىڭىز بايقاۋىڭىز مۇمكىن. ونى مىنا بەلگىلەر كورسەتەدى:
تىلدە جاسىلداۋ - اقشىل وڭەزدىڭ پايدا بولۋى؛
وڭ جاق قابىرعا استىنىڭ اۋىرۋى (ول ادەتتە مايدى تاماق جەگەننەن كەيىن پايدا بولادى).
«ەگەر وزىڭىزدەن وسى بەلگىلەردى بايقاساڭىز، قۇرساق قۋىسى ورگاندارىن جانە ءوت قابىن ۋ د ز- عا ءتۇسىرىڭىز: الدىمەن اش قارىنعا، سودان سوڭ ءوت ايدايتىن تاماق جەگەننەن كەيىن 45-60 مينۋت وتكەن سوڭ ونى تاعى ءتۇسىرۋ كەرەك. بۇل زەرتتەۋ وتتە تاس بار نەمەسە جوق ەكەنىن انىقتايدى. ۋ د ز سونداي-اق ءوت قابىنىڭ جيىرىلۋ جانە ءوتتى اش ىشەككە جەتكىزۋ قابىلەتىن باعالايدى. ەگەر وتتە تاس بولماسا، ءبىراق ونىڭ جيىرىلۋ قابىلەتى تومەن بولسا، ونى دارىلەرسىز جاقسارتۋعا بولادى. ونىڭ بىرنەشە ءادىسى بار»، - دەيدى دارىگەر.
اش قارىنعا جىلى سۋ ءىشۋ
جىلى سۋ سۋىق سۋعا قاراعاندا جاقسى سىڭەدى جانە ول سۋ تەپە-تەڭدىگىن قالىپقا كەلتىرەدى، ال بۇل ءوت جاعدايىنا جاعىمدى اسەر ەتەدى. تاڭەرتەڭ اش قارىنعا ءبىر ستاقان جىلى سۋ ءىشۋ ءوت ايداعىش جۇيەنى ىسكە قوسادى. سۋ جىلى نەمەسە ءسال ىستىقتاۋ بولۋى كەرەك. بۇل قاراپايىم ءادىس ءوتتى سۇيىلتادى. اش قارىنعا جىلى سۋ ءىشۋدى ادەتكە اينالدىرعان ءجون.
فيتوشايلار ءىشۋ
ءوت شىعۋىن رەتتەۋدىڭ تاعى ءبىر ءادىسى - ارنايى شوپتىك شايلار ءىشۋ. ونى اسىرەسە تاماق ىشۋگە جارتى ساعات قالعاندا ىشكەن دۇرىس. ءبىراق مىندەتتى تۇردە ءوز دارىگەرىڭىزبەن كەڭەسۋ قاجەت.
تاماقتانعاننان كەيىن جاتپاۋ
زاماناۋي ادامدار كوپ ۋاقىتىن وتىرىپ وتكىزەدى جانە از قوزعالادى. ورگانعا تاماقتانعاننان كەيىن كۇش تۇسەدى. ءوت قابى ءوتتى ءوت جولدارىمەن اش ىشەككە جەتكىزۋ ءۇشىن جيىرىلادى. ەگەر بۇل كەزدە ادام جاتسا، وندا ءوت قابى بۇرالادى جانە ءوزىنىڭ نەگىزگى قىزمەتىن اتقارا المايدى.
