دارحان قىدىرالى مەكتەپتەگى قازاقستان تاريحى وقۋلىعىن قايتا جازىپ شىعۋدى ۇسىندى

سەناتور دەپۋتاتتىق ساۋالىندا بيىل قازاقستان تاريحىنىڭ كوپتومدىعىن ازىرلەۋ جۇمىستارى اياقتالاتىنىن ەسكە سالدى.

«مەكتەپ وقۋلىقتارى وسى كوپتومدىق نەگىزىندە قايتا جازىلعانى ابزال. وندا جوشىنىڭ قازاق حاندارىنىڭ اتاسى ەكەنى باسا ايتىلۋى ءتيىس. سونىمەن قاتار وقۋلىقتارعا قازاق مەملەكەتتىگىنىڭ باستاۋلارى تۋرالى دا سونى دەرەكتەر ەنگىزۋ كەرەك. ماسەلەن 6-7-سىنىپقا ارنالعان وقۋلىقتا موعولستان مەملەكەتىنە 1 پاراگراف، 10-سىنىپقا ارنالعان وقۋلىقتا 4-5 جول عانا ارنالعان. ال وسى موعولستان جەرىندە شۋ بويىندا قازاق حاندىعىنىڭ نەگىزى قالانعانى بەلگىلى»، - دەدى دارحان قىدىرالى.

ونىڭ پايىمىنشا، جوعارى وقۋ ورىندارىنىڭ باعدارلامالارىنا قازاقستان تاريحىنىڭ كەيىنگى نۇسقاسىن ەنگىزۋ ماڭىزدى.

«جوشى ۇلىسىنا ارنالعان ىرگەلى زەرتتەۋلەر جۇرگىزۋ، ارنايى مۋزەي جاساقتاۋ، ەدىگە بايقاۋىن وتكىزۋ، ۇلىتاۋداعى ەسكەرتكىش كەشەندەردى يۋنەسكو ماتەريالدىق مۇرالار تىزىمىنە ەنگىزۋ دە وزەكتى. ەلىمىزدە وتەتىن دۇنيەجۇزىلىك كوشپەندىلەر ويىنى جوشىنى ناسيحاتتاۋ ءۇشىن ۇلكەن مۇمكىندىك. سوندىقتان ولارعا اقپاراتتىق قولداۋ كورسەتۋ، تانىمدىق دەرەكتى جانە كوركەم فيلمدەر مەن بالالارعا ارنالعان مۋلتفيلمدەر ۇسىنۋ دا ماڭىزدى»، - دەدى سەناتور.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى