دانيا سۋرەتشىسى كارتينا سالۋعا مۋزەيدەن اقشا الىپ، ورنىنا بوس كەنەپ بەرگەن

يەنس حاانينگ - كەدەيلىك، تەڭسىزدىك جانە كوشى-قون تۋرالى جۇمىستارىمەن تانىمال سۋرەتشى- كونتسەپتۋاليست.

كۋنستەن زاماناۋي ونەر سۇراجايى سۋرەتشىنى 2007-جىلعى ەڭ تانىمال جۇمىستارىنىڭ ءبىرىن قايتا جاساۋ ماقساتىندا جالدادى. بۇل دانيا حالقىنىڭ تابىسىنىڭ بەلگىسى رەتىندە كروندىق بانكنوتتارمەن قاپتالعان كەنەپكە سالىنعان سۋرەت بولۋى ءتيىس ەدى.

الايدا اۆتور «ورىندالعان» تاپسىرىس رەتىندە جۇرتشىلىق نازارىنا «اقشانى ال دا، قاش» اتاۋىمەن ەكى ۇلكەن بوس كەنەپتى ۇسىنعان.

كەيىننەن ولار كورمەگە قويىلىپ، كەلۋشىلەردىڭ ۇلكەن قىزىعۋشىلىعىنا بولەندى. ءبىراق مۇراجاي حاانينگتى كەلىسىم-شارت بۇزعانى ءۇشىن ايىپتاپ، اقشانى قايتارۋدى تالاپ ەتتى.

سۋرەتشى اقشانى قايتارۋدان باس تارتقاندا، مۇراجاي باسشىلىعى سوتقا جۇگىندى.

سوت شەشىمىمەن سۋرەتشى مۇراجايعا 67 مىڭ ەۋرو كولەمىندەگى گرانتتى قايتارۋى ءتيىس. دەگەنمەن، ول شامامەن 3500 ەۋرونى قۇراعان قالاماقىنى وزىنە قالدىرۋعا قۇقىلى.

دانيالىق راديوستانساعا بەرگەن سۇحباتىندا حاانينگ بۇل جۇمىسى قاتال ەڭبەك جاعدايىنا نارازىلىعى ەكەنىن ايتتى. ول جۇمىسشىلاردى ەڭبەك جاعدايى وزىنىكىندەي اۋىر بولسا، سولاي جاساۋعا شاقىردى.

«ەگەر ولاردىڭ جۇمىسى اۋىر بولىپ، جالاقى الماسا، مەنىڭ كەڭەسىم: قولعا تۇسكەنىن الىپ، قاشىڭىزدار»، - دەدى ول.

حاانينگتىڭ بۇل جۇمىسى - سۋرەتشىلەر ونەر الەمىنە جات ەمەس ابسۋرد، ەكىجۇزدىلىكتى اتاپ كورسەتكەن جۇمىستار مەن پەرفورمانستار ءتىزىمىنىڭ ءبىر بولىگى.

2018-جىلى سۋرەتشى بەنكسيدىڭ «شار ۇستاعان قىز» اتتى تۋىندىسى العاش رەت Sotheby's اۋكسيونىنا قويىلعان ەدى. سول كەزدە ونى ەۋروپادان كەلگەن كوللەكتسيونەر 1,28 ميلليون ەۋروعا ساتىپ العان.

الايدا ساۋدا سوڭىندا كارتينا جاقتاۋى تۋىندىنى قيىپ تاستايدى.

جۇمىستىڭ ءىس جۇزىندە جويىلعانىنا قاراماستان ساتىپ الۋشى كورسەتىلگەن سومانى تولەگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى