داۋلەت تۇرلىحانوۆ ۇلەسكەرلەر مۇڭىن كوتەردى
استانا. KAZINFORM - سوڭعى ەكى جىلدا ۇلەستىك قۇرىلىس سالاسىنداعى قىلمىستىق ىستەر بويىنشا 16 ادام سوتتالىپ، 300 دەن استام كومپانيا اكىمشىلىك جاۋاپكەرشىلىككە تارتىلعان. بۇل تۋرالى پرەمەر-ءمينيستردىڭ ءبىرىنشى ورىنباسارى رومان سكلياردىڭ اتىنا ساۋال جولداعان ءماجىلىس دەپۋتاتى داۋلەت تۇرلىحانوۆ ايتتى.
«20 جىل وتسە دە، الدانعان ۇلەسكەرلەردىڭ ماسەلەسى تولىق شەشىمىن تاپپاي كەلە جاتىر. وعان كوپتەگەن سايلاۋشىلاردىڭ ارىز-وتىنىشتەرى سەبەپ بولىپ وتىر. مىڭداعان قازاقستاندىقتار جاۋاپسىز قۇرىلىس سالۋشىلارعا سەنىم ارتىپ، تۇرعىن ءۇيسىز قالدى. ونىڭ ىشىندە زەينەتكەر دە، تۇرمىسى ناشار جانە كوپبالالى وتباسىلار، جالعىزباستى انا مەن مۇگەدەك جاندار دا بار. بۇگىندە قولىنداعى بار قاراجاتىن ۇيگە سالىپ، وزدەرى پاتەر جالداپ جۇرگەن حالىق كوپ. قولداعى مالىمەتكە سۇيەنسەك، سوڭعى ەكى جىلدا ۇلەستىك قۇرىلىس سالاسىنداعى قىلمىستىق ىستەر بويىنشا 16 ادام سوتتالىپ، 300 دەن استام كومپانيا اكىمشىلىك جاۋاپكەرشىلىككە تارتىلعان. جۋىرداعى ۇكىمەتتىڭ كەڭەيتىلگەن وتىرىسىندا مەملەكەت باسشىسى ۇلەسكەرلىك قۇرىلىس پروبلەماسىنا تاعى توقتالىپ وتكەن بولاتىن. دەگەنمەن ناقتى جۇمىس ازىرگە بايقالمايدى»، - دەدى ءماجىلىس دەپۋتاتى.
مىسالى، ونىڭ ايتۋىنشا، ءالى كۇنگە دەيىن قۇرىلىس كومپانيالارى ازاماتتاردى ءۇيدى تومەن باعامەن بەرەمىز دەپ، الداپ ءجۇر. ناتيجەسىندە اقشا دا، ۋادە ەتىلگەن «شارشى مەتر» دە جوق. كوبىنەسە قۇرىلىس سالۋشىلاردىڭ زاڭسىز ارەكەتتەرى ازاماتتاردىڭ قاراجاتىن الدىن الا كەلىسىلگەن شارتتار، ينۆەستيتسيالار سياقتى زاڭسىز باسقا باعىتتا جاسالادى.
«استانا قالاسىنىڭ اۋماعىندا 243 كوپپاتەرلى تۇرعىن ءۇي كەشەنىنىڭ قۇرىلىسى توقتاپ، وعان 40 مىڭنان استام ۇلەسكەر تارتىلعان ەكەن. وسى وبەكتىلەردىڭ ءارقايسىسىنىڭ قۇرىلىسىن اياقتاۋ مەملەكەتتىڭ تىكەلەي قاتىسۋىن تالاپ ەتەدى. قۇرىلىس كومپانيالاردىڭ سانى ازايعانىمەن، نەگىزگى پروبلەما وزگەرسسىز تۇر. مىسالى، استانامىزدا «ساتۋرن-1,2,3,4»، «سوفيا» سياقتى تۇرعىن-ءۇي كەشەندەرى اياقتالماعان، ال اياقتالعانىنىڭ قۇجاتى رەتتەلمەگەن. سونىمەن قاتار «ديانا»، «ونيكس»، «اسكەر-1»، «اسكەر-2»، «حازار»، «وازيس» سياقتى ونداعان جىلدار بويى قۇجاتى دۇرىستالماي، ءالى كۇنگە دەيىن قاجەتتى ينفراقۇرىلىمدار جاسالماعان تۇرعىن-ۇيلەر جەتەرلىك»، - دەدى داۋلەت تۇرلىحانوۆ.
ءماجىلىس دەپۋتاتىنىڭ ايتۋىنشا، قۇرىلىستى قابىلداۋ كوميسسياسىنىڭ جۇمىسىنا قاتىستى دا زاڭ بۇزۋشىلىقتار بار. بۇل تۇرعىن ءۇي كەشەندەرىن پايدالانۋعا قابىلدايتىن كەزدە بايقالادى. جىلداپ كۇتىپ، ازەر قولى جەتكەن باسپانانى العاننان كەيىن، ازاماتتارىمىز شەشىلمەگەن پروبلەمالارمەن سوتتىڭ تابالدىرىعىن توزدىرۋدا. وسىلايشا، ەلىمىزدەگى قۇرىلىس سالاسىندا ءبىراز ماسەلەلەر تۋىنداپ وتىر.
«ونىڭ ىشىندە جاۋاپسىز قۇرىلىس سالۋشىلاردىڭ سانىنىڭ ءوسۋى، ۇلەسكەرلەردىڭ قۇقىقتارىن قورعاۋدىڭ ءتيىمدى تەتىكتەرىنىڭ بولماۋى، سونداي-اق، مەملەكەتتىك ورگاندار تاراپىنان قاتاڭ باقىلاۋ مەن جۇيەلى تالاپتىڭ بولماۋى بار. وسىعان بايلانىستى، تەز ارادا ەلىمىز بويىنشا ۇلكەن پروبلەما تۋدىرىپ وتىرعان قۇرىلىس كومپانيالارىنىڭ جانە ونىڭ ارتىندا تۇرعان مىڭداعان تاعدىرلى وتباسىلاردىڭ ماسەلەلەرىن شەشۋدى سۇرايمىز»، - دەدى ول.
