د د ۇ: قىتايدا ەرەكشە نەمەسە جاڭا ينفەكسيالار جوق
دۇنيەجۇزىلىك دەنساۋلىق ساقتاۋ ۇيىمى (د د ۇ) قىتايدا رەسپيراتورلى ينفەكتسيالاردى جۇقتىرۋ جاعدايلارىنىڭ كۇرت ارتۋىن كۇن رايىنىڭ سالقىنداۋىمەن جانە ەلدە كوۆيدكە قارسى شەكتەۋلەردىڭ الىنۋىمەن بايلانىستىرىپ وتىر. Kazinform بۇل تۋرالى ەuronews-كە سىلتەمە جاساپ حابارلايدى.
بۇعان دەيىن قىتايدا ميكوپلازمالىق پنيەۆمونيا ينفەكتسياسى سياقتى رەسپيراتورلى اۋرۋلار كوپتەپ تارالىپ جاتقانىن جازعان بولاتىنبىز. وسىعان بايلانىستى دۇنيەجۇزىلىك دەنساۋلىق ساقتاۋ ۇيىمى تولىق اقپارات الۋ ءۇشىن قىتايعا سۇراۋ جىبەرگەن ەدى.
بەيجىڭنەن كەلگەن جاۋاپقا سۇيەنىپ د د ۇ ءمالىم ەتكەندەي، قىتايدا «جاڭا نەمەسە وزگەشە» رەسپيراتورلى ينفەكتسيالار پايدا بولماعان.
ۇيىمنىڭ حابارلاۋىنشا، الاڭداۋعا ازىرگە سەبەپ جوق.
د د ۇ- نىڭ ەپيدەميا مەن پاندەميالارعا دايىندىق جانە ولاردى بولدىرماۋ ماسەلەلەرى جونىندەگى ۋاقىتشا ديرەكتورى ماريا ۆان كەركحوۆەنىڭ Euronews-كە بەرگەن سۇحباتىندا اتاپ وتكەندەي، قىتايدا نەگىزىنەن مەكتەپ وقۋشىلارى اراسىندا رەسپيراتورلى ينفەكتسياعا شالدىعۋ جاعدايلارى ايتارلىقتاي ارتقان. بۇل جاعداي ەكى فاكتورمەن بايلانىستىرىلىپ وتىر: كۇن رايىنىڭ سالقىنداۋى جانە ەلدە كوروناۆيرۋسقا قارسى شەكتەۋلەردىڭ الىنۋى.
قىتايلىقتار ءۇشىن بۇل كارانتيندىك شەكتەۋلەرسىز العاشقى كۇز. ەل بيلىگى وزگەلەرگە قاراعاندا كوۆيدتىك شەكتەۋلەردى ەڭ كەش الىپ تاستادى - وتكەن جىلدىڭ جەلتوقسانىنان باستاپ، 2023 -جىل بويى كەزەڭ- كەزەڭىمەن. «ادامدار بەتپەردەلەردى تاستاعاننان كەيىن ادەتتەگى ماۋسىمدىق ۆيرۋستاردى كوپتەپ جۇقتىرا باستاعان»، - دەيدى د د ۇ-دان.
