ءىرى قارا مال تەرىسىنىڭ 78 پايىزى وڭدەلمەيدى: شەشىم قانداي
استانا. KAZINFORM - اۋىل شارۋاشىلىعى مينيسترلىگى ەلىمىزدە تەرى وڭدەۋ مەن ونى ەكسپورتتاۋعا قاتىستى تۇسىنىك بەردى.
- قازاقستانداعى تەرى وڭدەۋ نارىعىنىڭ قازىرگى جاي-كۇيىنە توقتالساق، 2023 -جىلدىڭ قورىتىندىسى بويىنشا 2548,5 مىڭ ءى ق م تەرىسى ءوندىرىلدى. ونىڭ 8 پايىزى (208,3 مىڭى) قايتا وڭدەۋگە جىبەرىلگەن، ال 13,7 پايىزى (349,6 مىڭى) رەسەيگە، تۇركياعا، قىرعىزستانعا، نيگەرياعا ەكسپورتتالدى جانە 4,5 مىڭ تەرى رەسەي فەدەراتسياسىنان يمپورتتالعان، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
اتاپ ايتقاندا، تەرىنىڭ 78 پايىزى (1997,1 مىڭى) وڭدەلمەگەن قالدىق كۇيىندە قالعان. وسىلايشا، ءى ق م تەرى شيكىزاتىنىڭ 8 پايىزى عانا وڭدەلەدى، ياعني شيكىزات كولەمى سالانىڭ وڭدەۋ مەن وتكىزۋ مۇمكىندىگىنەن ايتارلىقتاي جوعارى.
رەسپۋبليكادا تەرىنى باستاپقى وڭدەيتىن 9 كاسىپورىن جۇمىس ىستەيدى. وڭدەۋشى كاسىپورىنداردىڭ قۋاتتىلىعى 3,3 ميلليونعا دەيىن ءىرى قارا مال تەرىسىن، ۇساق مالدىڭ 4 ميلليوننان استام تەرىسىن وڭدەۋگە مۇمكىندىك بەرەدى. 2023 -جىلى ولاردىڭ جۇكتەلۋى %6,3 بولدى.
- تەرى وڭدەۋ سالاسىنىڭ دامۋىن تەجەپ تۇرعان سەبەپتەرگە كەلەتىن بولساق، ولارعا كاسىپورىنداردىڭ اينالىم قاراجاتىنىڭ تاپشىلىعى، وندىرىلگەن ءونىمدى وتكىزۋ نارىقتارىنىڭ شەكتەۋلىگى، ساپالى شيكىزاتتىڭ جەتكىلىكسىزدىگى جاتادى. اۋىل شارۋاشىلىعى ونىمدەرىن وڭدەۋدى دامىتۋ جونىندەگى 2024-2028 -جىلدارعا ارنالعان كەشەندى جوسپاردا تەرى وڭدەۋشى كاسىپورىندارعا شيكىزاتپەن قامتاماسىز ەتۋ ماقساتىندا 200-دەن استام مال تەرىسىن دايىندايتىن ءارى جينايتىن پۋنكتەر اشۋ جانە مەملەكەتتىك قولداۋ شارالارىن جەتىلدىرۋ قاراستىرىلعان. ودان بولەك، كەشەندى جوسپار اياسىندا تەرىنى تەرەڭدەتە وڭدەۋ بويىنشا ينۆەستيتسيالىق جوبالاردى جۇزەگە اسىرۋ كوزەلگەن جانە ونى ىنتالاندىرۋ ءۇشىن جاڭا كاسىپورىنداردى سالۋ، سونداي-اق جۇمىس ىستەپ تۇرعاندارىن جاڭعىرتۋ كەزىندە مال تەرىلەرىن وڭدەۋ كاسىپورىندارىنىڭ شىعىندارىن وتەۋ كوزدەلگەن. ينۆەستيتسيالىق سالىمنىڭ وتەۋ ۇلەسى %25، - دەپ اتالىپ وتكەن ۆەدومستۆو اقپاراتىندا.
بۇدان باسقا، كەشەندى جوسپار بويىنشا قايتا وڭدەۋشى كاسىپورىندارعا (سونىڭ ىشىندە تەرىنى وڭدەيتىن كاسىپورىندارعا) نەگىزگى جانە اينالىم قاراجاتتى تولىقتىرۋ ءۇشىن جەڭىلدەتىلگەن نەسيە بەرۋ قاراستىرىلعان.
- اتالعان شارالار تەرى-ءجۇن وڭدەۋ كاسىپورىندارىنىڭ جۇمىسىنا وڭ ىقپالىن تيگىزىپ، قازىرگى كەزدە بولىپ وتىرعان نەگىزگى ماسەلەلەردى شەشۋگە مۇمكىندىك بەرەدى، - دەلىنگەن اۋىل شارۋاشىلىعى مينيسترلىگى مالىمەتىندە.
ەسكە سالساق، بىلتىر قازاقستان مەن وزبەكستان كاسىپورىندارى تەرى وڭدەۋ سالاسىندا ارىپتەستىك ورناتاتىنىن جازعان ەدىك.
اۆتور
رۋسلان عابباسوۆ
