ءىرى كريپتوۆاليۋتا بيرجانىڭ نەگىزىن قالاۋشى 25 جىلعا باس بوستاندىعىنان ايرىلدى
استانا. KAZINFORM - ءىرى كريپتوۆاليۋتا بيرجالارىنىڭ ءبىرى FTX نەگىزىن قالاۋشى جانە بۇرىنعى باس ديرەكتورى سەم بەنكمان- فريدتى ا ق ش سوتى 25 جىلعا باس بوستاندىعىنان ايىردى، دەپ جازادى DW.
بۇعان دەيىن بەنكمان- فريد كليەنتتەردەن 8 ميلليارد دوللار جىمقىرىپ، قارجىلىق الاياقتىق ۇيىمداستىرعانى ءۇشىن كىنالى دەپ تانىلعان.
پروكۋراتۋرا وعان 40 جىلدان 50 جىلعا دەيىن باس بوستاندىعىنان ايىرۋ جازاسىن سۇرادى. ۇكىمدى بەيسەنبى، 28 ناۋرىزدا نيۋ- يورك وكرۋگىنىڭ سۋدياسى ليۋيس كاپلان جاريالادى. سوت كريپتوينۆەستوردى كليەنتتەرگە 11 ميلليارد دوللار كولەمىندە وتەماقى تولەۋگە مىندەتتەدى.
سۋديانىڭ ايتۋىنشا، ايىپتالۋشى «وسى قىلمىستاردى جاساعانى ءۇشىن ءبىر اۋىز وكىنىش بىلدىرگەن جوق».
2019 -جىلى نەگىزى قالانعان FTX بيرجاسى 2022 -جىلدىڭ قاراشاسىندا 32 ميلليارد دوللارعا باعالاندى. بەنكمان- فريدتىڭ ەكىنشى ءىرى بيزنەسىنىڭ اكتيۆتەرى نەگىزىنەن ءوز بيرجاسى شىعارعان كريپتوۆاليۋتادان تۇراتىنى تۋرالى جۋرناليستىك زەرتتەۋ جاريالانعاننان كەيىن كومپانيانىڭ قۇنى بىرنەشە كۇن ىشىندە نولگە دەيىن تومەندەدى.
اۆتور
ەركەجان سماعۇلوۆا
