عىلىمي اتاققا قوسىمشا تولەم جاسالادى - دارحان احمەد-زاكي

«بۇل قۇجات جوباسىنداعى نەگىزگى جاڭالىقتارعا توقتالساق، عىلىم سالاسىنداعى باسقارۋ جۇيەسىنە قاتىستى. سەبەبى ءقازىر جاڭا قۇرىلىمدار ىسكە قوسىلىپ جاتىر جانە ولار ءبىر-بىرىمەن ۇيلەسۋى كەرەك. سوندىقتان قۇرىلىمدىق بايلانىستى باسقارۋ جۇيەسىنە سايكەس كەلتىرۋ نورمالارى ەنگىزىلگەن. ەكىنشىدەن، ۇلتتىق عىلىم اكادەمياسى جاڭا ستاتۋسقا يە بولادى. سونىڭ اياسىندا جاڭا باعىتتار قامتىلادى. ۇشىنشىدەن، تەحنولوگيالىق ساياسات بويىنشا زەرتتەۋ ناتيجەلەرىن وندىرىسكە ەنگىزۋدى باعالاۋ جۇيەسىن ەنگىزۋ قاراستىرىلعان. ناتيجەسىندە، وسى باعىتتاعى قارجىلاندىرۋ دا وزگەرەدى»، - دەدى د. احمەد-زاكي پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، ۆەنچۋرلىق قارجىلاندىرۋ مەن تەحنيكالىق بيزنەس-ينكۋباتور يدەياسىن جەرگىلىكتى دەڭگەيدە دامىتۋ ەسكەرىلىپ، جاڭا زاڭ جوباسىنا ەنگىزىلگەن.

«مۇنىمەن قوسا، الەۋمەتتىك قولداۋ تەتىكتەرى قاراستىرىلدى. عىلىمي داراجەگە (Phd) سايكەس بۇرىندارى ءتيىستى تولەماقى بەرىلەتىن. سوعان قوسىمشا قازىر عىلىمي اتاققا بەرىلەدى. عىلىمي اتاق دەگەنىمىز - قاۋىمداستىرىلعان پروفەسسور نەمەسە دوتسەنت. پروفەسسور اتاعىن الۋ وتە قيىن. قورعاعاننان كەيىن جاس عالىمدار ءبىر ورىندا توقتاپ قالماس ءۇشىن وسىنداي تولەماقى ۇسىنىلدى. تولەم سوماسى 25 ا ە ك جانە 50 ا ە ك شاماسىندا بولادى. پروفەسسورلارعا اي سايىن ءتيىستى تولەم جاسالادى»، - دەدى ۆيتسە-مينيستر.

بۇدان بولەك عالىمداردى باسپانامەن قامتاماسىز ەتۋ نورمامى ۇسىنىلعان.

«جاقىندا وتباسى بانك جاس عالىمدارعا پاتەر بەرەتىن جاڭا باعدارلامانى ىسكە قوستى. ال ەندى جاڭا زاڭ جوباسى اياسىندا بۇل باستاما كەڭ اۋقىمدا تارالادى دەگەن ويدامىز. وتباسى بانكىمەن جاسالعان مەموراندۋمعا سايكەس، العاشقى بولىپ 100 جاس عالىمعا (تومەندەتىلگەن پايىزبەن يپوتەكا)، سودان كەيىنگى جىلدارى ولاردىڭ سانى ارتادى. 2026-جىلعا دەيىن ءبىر مىڭ ادام باسپانالى بولادى. «عىلىم جانە تەحنونولوگيالىق ساياسات تۋرالى» زاڭ جوباسى قابىلدانعاننان كەيىن، كەلەشەكتە مەملەكەتتەن دە قارجى بولىنەتىن شىعار. مۇنداي قولداۋ جاستارعا بولاشاققا دەگەن سەنىمدىلىك بەرەدى. سەبەبى، بۇل ولاردىڭ تەك عىلىممەن اينالىسۋعا سەپتىگىن تيگىزەدى»، - دەدى ول.

دارحان احمەد-زاكيدىڭ سوزىنە قاراعاندا، قازىر ەلىمىزدە 22 مىڭ عالىم بار. تۇجىرىمداماعا سايكەس، 2029 -جىلعا دەيىن ولاردىڭ سانى 29 مىڭعا جەتەدى.

ەلىمىزدەگى 22 مىڭ عالىمنىڭ 50 پايىزىندا عىلىمي دارەجەسى بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى