عىلىمي اتاعى ءۇشىن عالىمداردىڭ جالاقىسىنا قوسىمشا ۇستەمەاقى ەنگىزىلە مە

الەۋمەتتىك-مادەني دامۋ كوميتەتىنىڭ ءتوراعاسى اسحات ايماعامبەتوۆتىڭ ايتۋىنشا، بۇل زاڭ جوباسى ءماجىلىس پەن سەنات دەپۋتاتتارىنىڭ باستاماسىمەن ازىرلەنگەن. ونىڭ باستى ماقساتى - عىلىم مەن ءبىلىم سالاسىنداعى زاڭنامانى جەتىلدىرۋ.

«جوبامىزدا مەملەكەت باسشىسىنىڭ وسى باعىتتاردى دامىتۋ ءۇشىن بەرگەن ءبىرشاما تاپسىرماسى دا قامتىلىپ وتىر. ءبىرىنشى - عالىمدار ءۇشىن جاڭا ۇسەمەاقىلار ەنگىزۋ. قازىرگى ۋاقىتتا عىلىمي-زەرتتەۋ ينستيتۋتتاردا نەمەسە ۋنيۆەرسيتەتتەردە ىستەيتىن عالىمدارىمىز PhD، عىلىم دوكتورى، عىلىم كانديداتتارى سياقتى عىلىمي دارەجەلەرى ءۇشىن اي سايىن جالاقىسىنا قوسىمشا ۇستەمەاقى الادى. ول باياعىدان بەكىتىلگەن نورما. ەندى ولارعا پروفەسسور نەمەسە دوتسەنت سياقتى عىلىمي اتاقتارى ءۇشىن جالاقىسىنا قوسىمشا اقى بەرۋ وسى زاڭ جوباسىندا ۇسىنىلىپ وتىر. مىسالى، PhD، عىلىم كانديداتى قازىر اي سايىنعى جالاقىسىنا اتالعان عىلىمي دارەجەسى ءۇشىن 62 مىڭ تەڭگەگە جۋىق ۇستەمەاقى الادى. ەندى وعان دوتسەنت دەگەن عىلىمي اتاعى ءۇشىن تاعى 30 مىڭ تەڭگەگە جۋىق ۇستەمەاقى قوسىلادى. ياعني اي سايىن 92 مىڭ تەڭگەنى ايلىعىنا قوسىمشا ۇستەمەاقى رەتىندە الۋعا مۇمكىندىك بەرىلەدى. ال ەندى ول عىلىم دوكتورى بولسا جانە قازىرگى ۋاقىتتا 130 مىڭ تەڭگەگە جۋىق ۇستەمەاقى الىپ وتىرسا، وندا ول بۇل زاڭ قابىلدانعاننان كەيىن پروفەسسور اتاعى ءۇشىن تاعى دا قوسىمشا 60 مىڭ تەڭگەگە جۋىق ۇستەمەاقى الادى. بارلىعىن قوسقاندا 190 مىڭعا جۋىق ۇستەمەاقى جالاقىسىنا قوسىلادى. بۇل عالىمدارىمىزدىڭ قولداۋدىڭ ماڭىزدى تەتىگى دەپ سانايمىز»، - دەدى ول.

ونىڭ اتاپ وتۋىنشە، مۇنان بولەك زاڭ جوباسىندا جەتەكشى عالىمدارىمىز عىلىمي-زەرتتەۋ ينستيتۋتىندا نەمەسە ۋنيۆەرسيتەتتە 5 جىلدان استام جۇمىس ىستەسە، وندا ولارعا 1 جىلعا دەيىن شىعارماشىلىق دەمالىس بەرۋ كوزدەلگەن. سونىمەن قاتار وسى ۋاقىتتىڭ ىشىندە ولار اي سايىن ورتاشا جالاقى الىپ وتىرادى.

«ءبىر جىلدىڭ ىشىندە عالىمدارىمىز مونوگرافيالارىن شىعارۋعا، عىلىمي زەرتتەۋ جۇمىسىن اياقتاۋعا جانە ماقالالارىن شىعارۋعا ۇلكەن مۇمكىندىك الادى»، - دەدى دەپۋتات.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى