عىلىم مينيسترلىگىنەن جاساندى ينتەللەكت كوميتەتى اشىلادى
استانا. KAZINFORM -عىلىم جانە جوعارى ءبىلىم ءمينيسترى ساياسات نۇربەك ۆەدومستۆو قۇرامىندا جاساندى ينتەللەكت كوميتەتى پايدا بولاتىنىن ايتتى.
«جاساندى ينتەللەكت ابدەن سانگە اينالىپ كەتتى. جاساندى ينتەللەكت 2022 -جىلدىڭ اياعىندا بەلسەندى شىقتى. ال بىلتىرعى دامۋ پروتسەسىن عىلىمي ورتا «ويىن جىلى» دەپ اتاپ كەتتى. ءبارى وينادى، كوردى، تاڭعالدى. ەندى بيىل سالماقتى اڭگىمە بولاتىن ءتۇرى بار. جاساندى ينتەللەكت سالاسىنا بۇكىل الپاۋىت كومپانيالار كىرىسىپ كەتتى، تريلليونداعان ينۆەستيتسيا قۇيىلا باستادى. وسى سوڭعى 5 جىلدىڭ ىشىندە 27 مەملەكەت وزدەرىنىڭ ۇلتتىق جاساندى ينتەللەكت ستراتەگيالارىن قابىلدادى»، - دەدى ۆەدومستۆو باسشىسى.
سونداي- اق ول، بۇل جارىسقا قازاقستان دا قوسىلىپ كەتكەنىن ايتتى.
«بيىل ستراتەگيا قابىلدانادى. جاساندى ينتەللەكت بويىنشا ارنايى كوميتەت قۇرىلادى، سۋپەركومپيۋتەر الىنادى. ءبىزدىڭ ينستيتۋتتارىمىز ازىرلەگەن اۋقىمدى ءتىل مودەلى شىعادى. ول مودەلدى سۋپەركومپيۋتەردە جاتتىقتىرامىز دا، قازاقشا تۇسىنەتىن ءوزىمىزدىڭ تۇڭعىش ChatGPT پايدا بولادى. قازىر بۇكىل اراب ەلدەرىندە وزدەرىنىڭ ءتىل مودەلدەرىن جاساپ جاتىر. ولارعا جەڭىلدەۋ. ويتكەنى اراب تىلىندە شىققان عىلىمي ەڭبەك، جازبا ادەبي مادەنيەت كوپ. وكىنىشكە قاراي، ءوزىمىزدى قانشا ماقتاساق تا، بىزدە ونداي مىڭداعان جىلدىق كىتاپحانالار جوق. مادەنيەتىمىز دە، وركەنيەتىمىز دە اۋىزشا. سوندىقتان مادەنيەت جانە اقپارات مينيسترلىگىمەن بىرلەسىپ بۇكىل ب ا ق- تىڭ، كينوقوردىڭ مۇراعاتى نەگىزىندە وسى باعىتتا جۇمىس ىستەپ جاتىرمىز. سونى جەڭىلدەتۋ ءۇشىن وكسفورد ۋنيۆەرسيتەتى كومەكتەستى»، - دەدى مينيستر.
