عىلىم مينيسترلىگى ەل وڭىرلەرىنە قانداي ماماندار قاجەت ەكەنىن كورسەتەتىن كارتالار ازىرلەدى

2022-جىلدان بەرى ەلىمىزدە كادر دايارلاۋعا باعىتتالعان «ماماندىعىم - بولاشاعىم» جوباسى ىسكە اسىرىلىپ كەلەدى. جوبا قازاقستانداعى وڭىرلىك ەڭبەك نارىعىنىڭ وزەكتى سۇرانىسىن ەسكەرىپ، كادر دايارلاۋ جۇيەسىن قايتا فورماتتاۋدى كوزدەيدى.

- جوبانىڭ نەگىزگى مىندەتتەرى - ەكونوميكالىق دامۋداعى وڭىرلىك تەڭگەرىمسىزدىكتى تەڭەستىرۋ، وڭىرلەردەگى مەملەكەت، كاسىپورىندار، ءبىلىم بەرۋ ۇيىمدارى، جاستار، اتا-انالار ءۇشىن ەڭبەك نارىعى جانە ءبىلىم تۋرالى اقپاراتقا قول جەتكىزۋ جانە وڭىرلىك بولىنىستە ەڭبەك ونىمدىلىگى مەن حالىقتىڭ تابىسىن ارتتىرۋ. وسى باستامانى ۇيلەستىرۋ جانە ءتيىمدى ىسكە اسىرۋ ماقساتىندا «ماماندىعىم - بولاشاعىم» رەسپۋبليكالىق جوبالىق كەڭسەسى قۇرىلدى، - دەدى «ماماندىعىم - بولاشاعىم» كەڭسەسىنىڭ باسشىسى ولجاس ساكەنوۆ ورتالىق كوممۋنيكاتسيالار قىزمەتىندە وتكەن بريفينگتە.

سپيكەردىڭ ايتۋىنشا، ەلىمىزدىڭ 91 ج و و- سىندا جاڭا كاسىپتەردىڭ سالالىق اتلاستارى مەن وڭىرلىك كارتالار نەگىزىندە 902 ءبىلىم بەرۋ باعدارلاماسى ازىرلەندى. كوللەدجدەردە 45 ءبىلىم بەرۋ باعدارلاماسى اپروباتسيادان ءوتىپ جاتىر.

- 9 وڭىردە - پاۆلودار، ماڭعىستاۋ، قاراعاندى، الماتى، اقتوبە، جەتىسۋ، اقمولا، جامبىل وبلىستارى مەن استانا، الماتى قالالارىندا كادرلارعا قاجەتتىلىك بويىنشا وڭىرلىك كارتالار ازىرلەندى. وڭىرلىك كارتالاردى ازىرلەۋ قورىتىندىسى بويىنشا 473 ماماندىق انىقتالدى. edunavigator.kz پلاتفورماسىندا 100 مىڭعا جۋىق وقۋشى كاسىبي دياگنوستيكادان ءوتتى، - دەدى و. ساكەنوۆ.

ماسەلەن، پاۆلودار وبلىسىندا 9 سالا، 40 پەرسپەكتيۆالى ماماندىق، ماڭعىستاۋدا 3 سالا، 39 پەرسپەكتيۆالى ماماندىق، قاراعاندى وبلىسىندا 5 سالا، 58 پەرسپەكتيۆالى ماماندىق انىقتالعان.

استانادا 4 سالا، 17 پەرسپەكتيۆالى تجكب كاسىپتەرى؛ الماتى قالاسىندا 6 سالا، 114 پەرسپەكتيۆالى كاسىپ بار.

اقتوبە وبلىسىندا 43، جەتىسۋ وبلىسىندا 66، اقمولا وبلىسىندا 36، جامبىل وبلىسىندا 68 پەرسپەكتيۆالى ماماندىق بار.

بيىل 5 وڭىردە جوسپارلى نىسانالى قارجىلاندىرۋ ارقىلى، 6 وڭىردە - جەرگىلىكتى بيۋدجەت ەسەبىنەن «قازاقستان وڭىرلەرىنىڭ جاڭا كاسىپتەرى مەن قۇزىرەتتەرىنىڭ اتلاستارى» ازىرلەنىپ جاتىر.

بۇعان دەيىن جاساندى ينتەللەكت اسەرىنەن قانداي ماماندىقتار جويىلىپ كەتۋى مۇمكىن ەكەنىن جازعان بولاتىنبىز.

سونداي-اق، پرەزيدەنت تاپسىرماسىنا سايكەس جانە جۇمىسشى ماماندىقتارى جىلى اياسىندا ەلىمىزدىڭ ورتا ءبىلىم بەرۋ ۇيىمدارىندا پەداگوگ- كاسىپتىك باعدار بەرۋشى لاۋازىمى رەسمي تۇردە بەكىتىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى