ءۇي يەسى جالدامالى پاتەردەن قۋىپ جاتسا، نە ىستەۋ كەرەك؟
كەيدە پاتەردى جالعا بەرۋشى مەن الۋشىنىڭ اراسىندا كەلىسپەۋشىلىكتەر بولىپ جاتادى. ەگەر جالعا بەرۋشى پاتەر باعاسىن كۇرت كوتەرسە نەمەسە ۇيدەن شىعارۋدى شەشسە، ءسىز قۇقىعىڭىزدى قورعاي الاسىز. زاڭ بويىنشا انىقتاپ كوردىك.
مۇلىكتى جالعا الۋشىنىڭ مىندەتى مەن قۇقىقتارى
ق ر ازاماتتىق كودەكسىنىڭ 545-بابى بويىنشا، جالعا الۋشى پاتەردى بوساتپاس بۇرىن ءبىر اي الدىن مۇلىك يەسىنە ەسكەرتۋگە مىندەتتى.
سونىمەن قاتار كوشپەس بۇرىن تۇرعىن بارلىق قارىزدى وتەپ، كوممۋنالدىق قىزمەتتەردى تولەپ، مۇلىك تىزىمدەمەسى بويىنشا تەحنيكا مەن جيھازدى تەكسەرۋى كەرەك. جالداۋ شارتى توقتاتىلعاننان كەيىن جالعا الۋشى پاتەردى شارتتا بەلگىلەنگەن جاعدايدا قايتارۋعا مىندەتتى. ەگەر شارت اياقتالعاننان كەيىن مۇلىكتىڭ جاي-كۇيى تالاپتارعا سايكەس كەلمەسە، جالعا الۋشى كەلتىرىلگەن زالالدى وتەيدى.
مۇلىك يەسى سىزگە توسىننان حابارلاسىپ، ەرتەڭ پاتەردى بوساتۋدى سۇراسا، ونىڭ بۇل ءىس- ارەكەتى زاڭعا قايشى بولىپ ەسەپتەلەدى. سەبەبى كەلىسىمشارت بويىنشا جالداۋ مەرزىمى اياقتالسا، جالعا بەرۋشى بۇل تۋرالى جالعا الۋشىعا جازباشا ەسكەرتۋ جاساۋى كەرەك.
ال شارت مەرزىمسىز جاسالسا، ءۇي يەسى ۇيدەن شىعارۋ تۋرالى ءۇش اي بۇرىن ەسكەرتۋى كەرەك.
«پاتەر يەسى دەپوزيتتى قايتارماي وتىر»
كەيىنگى كەزدە پاتەردى دەپوزيت تولەمەي جالعا الۋ مۇمكىن بولماي بارادى. دەپوزيت - بۇل ساقتاندىرۋ سوماسى. جالعا الۋشى مۇلىكتىڭ ىقتيمال زالالىن وتەۋ ءۇشىن مەنشىك يەسىنە دەپوزيت بەرەدى. شارت مەرزىمى اياتالعاننان كەيىن، ءبارى ورنىندا بولسا، بۇل سوما وعان قايتارىلۋعا ءتيىس. دەپوزيتتى قايتارماۋ تۋرالى تالاپتار شارتتا ناقتى جازىلۋى كەرەك.
ەگەر مەنشىك يەسى دەپوزيتتى قايتارۋدان باس تارتسا، ونى تەك سوت ارقىلى ءوندىرىپ الۋعا بولادى. دەپوزيتتى قايتارۋ بويىنشا تالاپ قويۋ ءۇشىن تۇرعىن ءۇي يەسىنىڭ تىركەلگەن جەرى بويىنشا سوتقا جۇگىنۋ قاجەت. وتىنىشكە دەپوزيتتى تولەگەنى تۋرالى تۇبىرتەك قوسا تىركەلەدى.
«پاتەردى بوساتۋىمدى تالاپ ەتىپ، قۋىپ جاتىر»
كەلىسىمشارتتىڭ مەرزىمى اياقتالعانىنا قاراماستان، تۇرعىندار پاتەردەن شىقپاسا، جالعا بەرۋشى كوشىرۋ تۋرالى تالاپ-ارىزبەن سوتقا جۇگىنە الادى.
جالعا بەرۋشى جالعا الۋشىلاردى سوتقا بەرە الادى:
جالعا الۋشىلار مۇلىكتى ادەيى نەمەسە ابايسىزدا بۇلدىرسە؛
پاتەر شارتتا بەلگىلەنگەن ماقساتقا ساي پايدالانىلماسا (مىسالى، كەڭسە نەمەسە دۇكەن رەتىندە)؛
تۇرعىندار جالداۋ اقىسىن ەكى رەتتەن ارتىق كەشىكتىرسە.
الايدا جالداۋ شارتىن بۇزباس بۇرىن، پاتەر يەسى جالعا الۋشىعا قاتەلەردى تۇزەتۋگە مۇمكىندىك بەرۋى كەرەك.
«مۇلىك يەسى پاتەردى ساتۋ تۋرالى شەشىم قابىلداپ، ال ماعان ەسكەرتكەن جوق»
ەگەر جالداۋ مەرزىمى اياقتالماسا، جالعا الۋشى كوشپەۋگە قۇقىلى.
تۇرعىن ءۇيدى جالعا بەرۋ - اۋىرتپالىقتىڭ ءبىر ءتۇرى. ەگەر پاتەر يەسى ونى ساتۋ تۋرالى شەشىم قابىلداسا، ول اۋىرتپالىقپەن بىرگە ساتىلادى. جالعا بەرىلگەن پاتەر ساتىلعانىمەن، جالعا بەرۋشىنىڭ اۋىسۋى شارتتىڭ كۇشىن جويمايدى. جالداۋ شارتى پاتەردىڭ بۇرىنعى يەسىمەن جاسالسا، كەلىسىمشارتتىڭ كۇشى ونىڭ مەرزىمى اياقتالعانعا دەيىن جاڭا يەمەن جارامدى.
ايتا كەتەيىك، بۇعان دەيىن جالدامالى ۇيدە تۇراتىن ادامدار ەرتە قارتاياتىنى تۋرالى حابارلانعان ەدى.
اقپارات دەرەككوزى: massaget.kz
