ءوزىڭىزدى كىنالى سەزىنبەڭىز. پسيحياتر ايەلدەرگە كەڭەس بەردى

«ءبىزدى گورموندار باسقارادى دەگەن بەكەر ايتىلماعان. بۇل - راس. ءبىراق %100 بۇكىل ايەلدە سولاي بولادى دەپ ايتا المايمىن. كەي ايەلدەر ونى سەزبەيدى. ال ەگەر سىزگە ول اسەر بەرسە، مىسالى، اشۋلانعىڭىز كەلىپ تۇرسا، اشۋلانىپ الىڭىز، مۇڭايعىڭىز كەلسە، مۇڭلى ءان قوسىپ، جىلاپ الىڭىز، جالعىز قالعىڭىز كەلىپ تۇرسا، ءبارىن ءوشىرىپ، بولمەنىڭ ەسىگىن جاۋىپ، ءسال ۋاقىت جالعىز وتىرىڭىز. جاي عانا باقىلاۋ كەرەك. ءبىزدىڭ پسيحيكا بىزگە نە كەرەك ەكەنىن ءوزى ايتادى. ءدال قازىر اشۋلانىپ تۇرساڭىز، ال جۇمىسىڭىز كوپ بولسا، مۇمكىندىك بولسا، ءسال ءۇزىلىس العان دۇرىس. الايدا ايەلدەردىڭ كوبىندە بالالارى بار جانە مىندەتتەرى كوپ. ارينە، بىزگە ايتۋ وڭاي. ءبىراق سىزگە سىرتتان كومەك كەرەك بولۋى مۇمكىن. جولداسىڭىزدان، تۋىستارىڭىزدان، دوستارىڭىزدان بالاعا قاراي تۇرۋىن ءوتىنىپ، ءوز-وزىڭىزگە كەلىپ الىڭىز: ۇيىقتاپ الىڭىز، ەركەلەڭىز، سىرتقا شىعىپ، كوفە ءىشىپ كەلىڭىز. ءوز-ءوزىڭىزدى قۇتقارىپ الۋىڭىز كەرەك. ءبىراق ءوزىڭىزدى كىنالى سەزىنىپ، ءوزىڭىزدى سىناۋدىڭ قاجەتى جوق. مۇنىڭ بارلىعى - گورموندار. وعان ەشتەڭە ىستەي المايسىز، ال ەگەر وتە قاتتى اشۋلانىپ جانە ول وتە ءجيى قايتالانسا، گينەكولوگ مامانعا بارىپ، تەكسەرىلۋ كەرەك»، - دەيدى دارىگەر.

سونداي-اق پسيحياتر كەز كەلگەن ادامنىڭ ومىرىندە ۇيقىنىڭ ءرولى ماڭىزدى ەكەنىن ەسكەرتتى.

«ءبىزدىڭ ومىرىمىزدە ۇيقىنىڭ ماڭىزى زور. پسيحياتريادا كەز كەلگەن اۋرۋدى ەمدەۋ كەزىندە ءبىز ەڭ ءبىرىنشى ۇيقىعا ءمان بەرەمىز. ۇيقىنى رەتتەمەي، ۇرەيدەن، دەپرەسسيادان جانە باسقا دا پسيحوزداردان ارىلۋ قيىن. ويتكەنى ءبىزدىڭ اعزامىزدا ۇيقى كەزىندە كوپتەگەن قالىپقا كەلۋ پروتسەستەرى جۇرەدى. ۇيقىعا نەشەدە جاتقانىڭىز ماڭىزدى. تۇنگى 3:00-دەن تاڭەرتەڭ 10:00-گە دەيىن 7 ساعات ۇيىقتايمىن دەگەن سانالمايدى. مىندەتتى تۇردە مەلاتونين بولىنەتىن ۋاقىتتا ۇيىقتاۋ كەرەك. ساعات 22:00-22:30-دا ۇيىقتاۋعا جاتۋ كەرەك»، - دەپ كەڭەس بەردى ارايلىم شىڭعىسحان قىزى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى