ءوزىمىز دە قىز تاربيەلەپ وتىرمىز - ەدىل جاڭبىرشىن قىز الىپ قاشاتىندارعا قىلمىستىق جاۋاپكەرشىلىك ەنگىزۋدى ۇسىندى
استانا. KAZINFORM - ءماجىلىس دەپۋتاتتارى قىز الىپ قاشۋ ارەكەتىنە زاڭمەن توسقاۋىل قويۋدىڭ بىرنەشە جولىن ۇسىندى.
مادەنيەت تۋرالى زاڭنامانى جەتىلدىرۋگە ارنالعان زاڭنىڭ جوباسىن تالقىلاۋ كەزىندە قىز الىپ قاشۋ ءداستۇرىن ءان ارقىلى ناسيحاتتاپ جۇرگەن ونەر يەلەرىنە سىن ايتىلدى.
- بەلگىلى انشىلەر قازىر ساحنادا وسىنداي اندەر ايتىپ ءجۇر. ونى تەلەديداردان كورسەتەدى.
«الىپ قاشام،
مەيلى ولاي قالاما
كەلىن قىلام سەنى قالاي دا اناما» ، - دەپ شىرقاپ ءجۇر.
ەكىنشى ءانشى ايتادى:
«كورەسىڭ
مەنىڭ ۇيىمە باراسىڭ!
باسىڭا اپپاق ورامال تاعاسىڭ
كوندىرەم،
كونەسىڭ!
قىز بولىپ كەلەسىڭ
كەلىن بولىپ قالاسىڭ»، - دەيدى. وسىنداي ماجبۇرلەۋدى تەلەديدار ارقىلى ناسيحاتتاپ ءجۇرمىز. مۇنداي كونتەنتكە تىيىم زاڭمەن تىيىم سالۋ كەرەك، - دەدى دەپۋتات مۇرات ابەنوۆ.
ەدىل جاڭبىرشين ارىپتەسىنىڭ پىكىرىنە قولداۋ ءبىلدىردى.
- باسقا ۇلتتىڭ بىرەۋى جاسامايدى. جاساپ جۇرگەن ءوزىمىز. مەنىڭ ءۇش قىزىم بار، مىسالى. الدىمىزدان ءوتىپ، قۇدا ءتۇسىپ العانىن ءبارىمىز دە جاقسى كورەمىز. ال مىناۋ قوعامداعى ۇلكەن دەرت. ۇلكەن ماسەلە. بۇعان قىلمىستىق جاۋاپكەرشىلىك قاراستىرۋ كەرەك، - دەدى دەپۋتات.
ءماجىلىس ءتوراعاسى ەرلان قوشانوۆ بۇل ماسەلەنىڭ كۇن تارتىبىندەگى زاڭدارعا قاتىسى جوق بولعانىمەن، الداعى وتىرىستاردا جەكە تالقىلاۋعا لايىق ەكەنىن ايتتى.
