ءوزىم سەنە الماي وتىرمىن. 20 ميلليونىنشى قازاقستاندىقتىڭ اكەسى سۇحبات بەردى
قازاقستان حالقىنىڭ سانى 20 ميلليونعا جەتتى. بۇل جاڭالىقتى پرەزيدەنت قاسىم-جومارت توقايەۆ جاريالادى. ماسساگەت ءتىلشىسى 20 ميلليونىنشى قازاقستاندىقتىڭ اكەسىمەن سۇحباتتاستى.
بالانىڭ اكەسى مۇحتار ازيمبايەۆ - جەتىسۋ وبلىسىنىڭ تۇرعىنى، اسكەري سالاداعى قىزمەتكەر.
«ءوزىم اسكەري اداممىن. 1989 -جىلى دۇنيەگە كەلگەنمىن. اسكەري ادام بولعان سوڭ 2013 -جىلى اۋە قورعانىس كۇشتەرىنىڭ اسكەري ينستيتۋتىن بىتىرگەنمىن. 2009 -جىلى اقتوبە قالاسىنداعى اۋە قورعانىس كۇشتەرىنىڭ اسكەري ينستيتۋتىنا وقۋعا ءتۇسىپ، 2013 -جىلى ءبىتىردىم. سول ۋاقىتتان بەرى جوعارى قولباسشىلىق بۇيرىعىمەن تالدىقورعان قالاسىندا اسكەري قىزمەتكە كەلدىم. قازىر تالدىقورعان قالاسى 21751 اسكەري بولىمىندە قىزمەت ەتىپ جاتىرمىن»، - دەيدى ول.
مۇحتاردىڭ جۇبايىنىڭ ەسىمى - ديانا ازيمبايەۆا. ول 1996 -جىلى دۇنيەگە كەلگەن. ديانا تولەم ورتالىعىندا جۇمىس ىستەگەن.
مۇحتار مەن ديانا 2015 -جىلى شاڭىراق كوتەرگەن. ال بيىل ولار كوپبالالى اتا-انا اتانىپ وتىر.
«ەكەۋمىز 2015 -جىلى وتاۋ قۇردىق. قازىر 4 بالامىز بار. ءبىرىنشىسى - 2016 -جىلى تۋعان ايزەرە سابدەنباي ەسىمدى قىزىمىز، ەكىنشىسى - 2018 -جىلى تۋعان مۇحاممەدامين سابدەنباي ەسىمدى ۇلىمىز، ءۇشىنشىسى - 2020 -جىلى دۇنيەگە كەلگەن مەيران سابدەنباي ەسىمدى ۇلىمىز. ال 14 قاراشادا دۇنيەگە كەلگەن - ءتورتىنشى بالام»، - دەيدى ول.
مۇحتار ازيمبايەۆ ۇلىنا قانداي ەسىم تاڭداعاندارىن دا ايتتى.
«ەندى 1 قىز، ءۇش ۇلىمىز بار. كوپبالالى وتباسى اتاعىنا يە بولىپ وتىرمىز. جولداسىمىز ەكەۋمىز اقىلداسا كەلە بالاعا ايسۇلتان دەگەن ات قويدىق. اكە-شەشەلەرىمىز دە وزدەرىنىڭ ۇسىنىستارىن ايتىپ جاتىر»، - دەيدى ول.
بالانىڭ اتا-اناسى قۋانىشتان بۇل جاڭالىققا ءالى دە سەنە الماي وتىر ەكەن.
«شىنىن ايتايىن، ءوزىم كەشە ءبىلىپ وتىرمىن. مەندە مۇنداي ءبىرىنشى رەت بولىپ تۇر. قۋانىشتى سەزىم، سوزبەن جەتكىزە المايمىن. بالالار دا قاتتى قۋانىپ جاتىر. ءوزىم سەنە الماي وتىرمىن. ءالى ەشكىمگە ەشتەڭە ايتقان جوقپىن، ەشكىم بىلمەيدى. بوسانعانىن بىلەدى، 20 ميلليونىنشى قازاقستاندىق بولىپ جاتقانىن بىلمەيدى»، - دەيدى ول.
مۇحتار ازيمبايەۆ جان-جاقتان حابارلاسىپ جاتقانىن ايتادى.
«تۋا سالا جان-جاقتان حابارلاسىپ جاتىر. «20 ميلليونىنشى تۇرعىن ءسىزدىڭ ۇلىڭىز، قۇتتىقتايمىز. ءبىراز ۋاقىتتان كەيىن حابارىن ايتامىز» دەپ اكىمدىكتەن حابارلاستى»، - دەيدى تالدىقورعان تۇرعىنى.
قازىر 20 ميلليونىنشى قازاقستاندىق ايسۇلتاننىڭ دا، ونىڭ اناسىنىڭ دا جاعدايى جاقسى ەكەن. اكەسىنىڭ سوزىنشە، ەرتەڭ پەرزەنتاحانادان شىعاراتىندارىن ايتقان.
ايتا كەتەيىك، حالىقتىڭ دەرەكتەر بازاسىنىڭ كورسەتكىشتەرىنە سايكەس، 14-قاراشادا تاڭعى ساعات 8.10-دا تۋعان 5 بالا ەلىمىزدىڭ 20 ميلليونىنشى تۇرعىنى اتاندى. قازاقستاننىڭ مەرەيلى ازاماتتارى ۇلىتاۋ، جەتىسۋ، اتىراۋ، اقمولا جانە تۇركىستان وبلىستارىندا دۇنيەگە كەلدى. ولاردىڭ ىشىندە 3 ۇل جانە 2 قىز بار.
ەسكە سالايىق، بۇعان دەيىن قازاقستاننىڭ 20 ميلليونىنشى تۇرعىنى ومىرگە كەلگەنى حابارلاندى. بۇل تۋرالى پرەزيدەنت قاسىم-جومارت توقايەۆ X- پاراقشاسىندا جازدى.
«حالقىمىزدىڭ سانى 20 ميلليونعا جەتتى! بارشاڭىزدى اقجولتاي جاڭالىقپەن قۇتتىقتايمىن! باقىتتى وتباسى - باقۋاتتى ەلدىڭ نەگىزى. مەملەكەت وتباسى قۇندىلىقتارىن نىعايتۋعا، انا مەن بالانى قورعاۋعا باسا ءمان بەرەدى»، - دەپ جازدى پرەزيدەنت.
