ءوڭىر اكىمدەرى اۋا رايى بولجامىنا ءجىتى نازار اۋدارماعان - ەرلان نىسانبايەۆ
استانا. KAZINFORM - ءوڭىر اكىمدەرى سۋ تاسقىنى قاۋپىنە ءتيىستى دەڭگەيدە باعا بەرمەگەن. بۇل تۋرالى ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى.
«وتكەن جىلدىڭ كۇزىندە جاۋىن-شاشىن كوپ ءتۇسىپ، بۇل توپىراقتىڭ ايتارلىقتاي ىلعالدانۋىنا سەبەپ بولدى. سودان كەيىن قاتتى اياز اسەرىنەن توپىراقتىڭ قاتۋى بايقالدى. قىس كەزىندەگى مول جاۋىن- شاشىننان كەيىنگى ەرۋ قاردىڭ قالىڭدىعىندا جانە توپىراق بەتىندە مۇز قاباتتارىنىڭ پايدا بولۋىنا اكەلدى. جوعارىدا اتالعان فاكتىلەردى ەسكەرە وتىرىپ، جەلتوقسان ايىنىڭ وزىندە وڭىرلەر بولىنىسىندە سۋ تاسقىنى قاۋپى بار ۋچاسكەلەر ايقىندالدى. جەلتوقسان، اقپان جانە ناۋرىز ايلارىنىڭ باسىنداعى بولجامداردا كورسەتىلدى جانە اكىمدىكتەر مەن ورتالىق ورگاندارعا جولداندى»، - دەدى ول.
ءمينيستردىڭ ايتۋىنشا، 15-ناۋرىزدان باستاپ بۇگىنگى كۇنگە دەيىن قازگيدرومەت 100 دەن استام داۋىل بويىنشا ەسكەرتۋ جاريالادى. ولار حابارلاۋ سحەماسىنا سايكەس جەرگىلىكتى اتقارۋشى جانە ورتالىق مەملەكەتتىك ورگاندارعا جىبەرىلدى جانە قازىرگى كەزدە دە جولدانىپ جاتىر.
«الايدا، اكىمدىكتەر بولجامعا قاجەتتى دەڭگەيدە نازار اۋدارمادى، وسى سەبەپتى سۋ تاسقىنى قاۋپىنە ءتيىستى باعا بەرىلمەدى جانە ۋاقتىلى الدىن الۋ شارالارى قابىلدانبادى»، - دەدى ەرلان نىسانبايەۆ.
